最近近況

好似都有好幾天沒有出過文章了。

最近仍然是忙得很，農曆年過後，雖然好似是過左一個月左右，但已經接了大概七單工程，有大有小的，加埋好似七十萬左右，當開始收左客人訂金的時侯，由那天開始，就好難可以好得閒，因為會有很多人會追你做野。這是好正常的，最大的原因是香港的租貴！

當租金貴時候，客人雖然都早已找到地方暫住，有可能是在親戚朋友暫住，當然都唔想打攪人咁耐。第二個可能就是出去短租，但短租的單位難找，因為是很少業主願意租畀一些只租一兩個月的租客，於是另一個選擇就是走去租些酒店式住宅，而這些地方的租金，一點也不便宜，閒閒地都要成萬銀一個月。所以，好易理解作為客人一定想你有咁快得咁快完成單工程，唔駛出去住畀貴租或打攪人，亦唔駛蝕管理費。

就是這個緣故，我做了裝修這一行都好似有１８年了，都好似未聽過一個客人可以叫你慢慢做，十個有十個都是好趕！

最終的原因，就是租貴的問題！

就是因為租貴，所以人工一定要高才可以支持到日常支出，因此租金貴也帶動了人工貴！

人工是不可以儲存的，如果不是月薪長工的話，如裝修佬的打工的［長散］，自僱人仕判工程做（自己僱自己），一天沒有工開，就是等於當天沒有收入了。所以師傅都會追你安排工作給他們做！

不單是安排工作咁簡單，正所謂三軍未動糧草先行，人未到料要先到，所以安排人手前，早已安排材料上場了。這都並不止是我每天的工作，還要計數，打單，送貨，劃圖設計，仲要撈埋師傅那一份。所以其實真係唔係好得閒。真是一天廿四小時是唔夠用的。農曆年初四開工至今，未休過一日息，仲要開埋夜。

乜裝修可以開夜工嗎？

是的，例如做公屋的，單幢樓的，只要唔太糟，通常是冇乜投訴，而那些住公屋的，是沒有投訴鋪癮的。反而大型屋苑就好麻煩，星期六下午ＯＦＦＩＣＡＬ係唔畀開工的，如果番半天，而家陣交通費又咁貴，做幾個鐘就要走，基本上師傅都唔想開工，而老細亦唔想叫佢開工，因為做幾個鐘做唔到啲乜，實質是嘥人工。

啲食蕉有一鋪癮，就是成日叫啲師傅收工，因為佢地好怕畀人投訴！師傅收工未呀？就是食蕉啲口頭禪！

你估師傅好鍾意開工咩？

都唔知幾倦想早啲番屋企休息，不過日日都畀人追來追去，邊可以畀你慢慢做？很快就一個月，又要交乜費物費了，唔番工邊處有錢呀，做少啲都唔得呀，成日都話要收工休息，唔駛交貨啦！

所以其實好多問題，都是租貴的問題，我將有一篇文章是寫下啲租有幾貴，就以我以前打開門口做生意的故事，講下啲生意其實是好難做，真係做埋夠交租，當中包括很多數字，當然是大家都會不知道的，因為是內部數字！不過現時只是寫左一半左右，遲啲先至發表。。。

最近大市下跌，很多人都叫人買防守性股份，如ＲＥＩＴＳ！

但我是行相反，就是沽ＲＥＩＴＳ！

最近以＄６。８９沽清埋置富（７７８），這隻股持貨好似都有一年有多了，應該是升左近倍，買的時候好似是＄３。５左右吧。現時手上並沒有持有任何一隻ＲＥＩＴＳ了！

沽出的原因當然不是看淡置富（７７８），而是在大市跌的時侯，這些股是相對硬淨（起初），但因其他股份下跌得多的時候，在［相對］／［比較］價格下，這些股票就相對貴了，所以套些購買力去撈一些有實力又跌得多的股份，是我認為較可取的方法。

我的目標仍然是［燃氣股］，可是最近［燃氣股］都仲係好強，看看有冇機會可以再撈。

我其實是好想買多啲［燃氣股］，但我是唔會好積極去高追，現時是等緊機會，希望有這一天，而［燃氣股］我是想長揸三至五年，這是初步構思！

現時仍然有現金可以再投入股市，但是沒有好迫切要入市，啱價有機會就隨時可以買，但唔係一定日日都要買的。

本應今年想在３月業績期後就開始減緊啲貨，因為通常炒完業績就冇乜嘢好炒，個市自然會軟些！業績期後，都想都要找啲借口推冧個市，然後又靜雞雞撈平野，這差不多是年年的工作所謂５窮６絕７番身，是有道理的，因為７月開始又可始部署炒定下一期成績表了！


可是最近已發現時常有［偷步］，所以未到成績表派發期，已散左！又是偷步了一個月左右。所以又要進化，不是等　ＭＡＣＤ　升穿ＥＭＡ（９），而是［蘊釀］升穿更有勝算。

所以時常聽到一些市場［憂慮］乜［憂慮］物，攪咁多屎棍又是想砌番冧佢。砌冧佢之後，又說番冇乜［憂慮］，又砌番上去。這些跌市，我想我都經過左唔知幾多個了，所以我早已沒有感覺了，所以我時常說，升市時不要太過振臂歡呼，因為隨時是一個災難的來臨；跌市時亦不要太過心灰意冷，因為很多時是一個機會的到來。

今年未必等７月才番身，可能又會偷步，６月可能是不錯的入市時機！

至於網友的問題，可能明天做完工作會覆！

YOKI WONG