潛水艇發盈喜！！

在我的投資組合中，有一隻佔比重最低，而至今又［潛］得最深的股票，今天收市後竟然發盈喜：

這隻［深海能源］，在５月上旬見佢在高位有異動，博佢破位，點知由買那一天開始，就座了［鮫龍號］去左探測［深海能源］！


所以唔係次次都可以博到，這次就是一個失手的例子，中了伏兵！


但這又不用怕，只要贏的次數多過輸的次數，就值得繼續用這個方式去博，最近博贏的是２５７，８６８，３７１，５７９，９１６等，博輸的是７５０，所以命中有８成幾，輸番一隻都已有好高值博率！


這隻股，基本因素是不錯的，市盈率現時只有６倍幾，而我買的時候，市盈率也只是８倍左右，從股值論，以這間公司的質素，未至於可以在市場上叫到２０倍ＰＥ的價錢，在理解可以在華南地區成為在銷售和分銷液化石油氣、銷售成品油及銷售電子產品等有一定程度的壟斷，合理的股值應該是在十五倍ＰＥ左右，不至於低到而家只有６倍！


以＄５。４２入了貨之後，破不到位，點知跌過唔停，跌至最新價＄４。１８，有壞消息嗎？

對唔住，係沒有！

總之，就是日日插！


在７月１１日，有個叫富達的基金增持，平均買入價＄４。２７，但佢買左之後，同樣都要乘坐［鮫龍號］去探測［深海能源］！


有很多網友都會想問下自己持有的某隻股票，為什麼跌過不停，是否應繼續持有之類。。。。等問題！


在這隻［深海能源］的例子，可否給你一個［啟示］呢？


你想問點解會跌？

找資料，是冇！

總之就是一日跌少少，以［深海能源］的例子，可以跌足３個月！

大戶是很有錢的，股價跌，ＳＯ　ＷＨＡＴ，他們一買番，股價自然會上番去，所以股價高低是不在乎，因為他們是控制緊高低，這就是市場上的ＰＲＩＣＥ　ＳＥＡＲＣＨＥＲ，而作為散字派的你，在市場上只是其中一個ＰＲＩＣＥ　ＴＡＫＥＲ！

你玩股票，抑或股票玩你，係最看你有冇錢守的問題，如果你好等錢用，那麼跌足３個月又跌咁多，我想好多人都頂唔順了，最後，就成為大戶的點心了！

通常這樣的跌，是有兩個可能性！

以前都說過了：


第一，就係間公司跟本係唔掂，有內幕人仕比大家早知消息，在市場不斷沽貨走人


第二，就係有莊家大戶做緊野，最終的目的就是要你沽貨離場，以達到他們收貨的目的！


所以，在沒有資料下，兩個可能性都是有，最終大家都是靠估！


如果是第一個結果，公司最後都會發盈警，在這時候的操作就是要即時沽出，因為已找到跌的原因了，雖然比［內幕人仕］遲了很多，這個先天不足，無話可說了，鬼叫你冇內幕料咩！唯一的動作就是在市場上作出反應的最快一批！


如果第二個結果，都是要等派成績表後先至知，但通常那個時候，那些莊家大戶已收貨收得７７８８，再用其餘下的資金炒佢上去，再派番出來賺差價。


可是，［深海能源］突然之間發盈喜，會否影響到大戶莊家的部署？

今天仲壓得好緊啊！


當大家仲估下係唔係盤數唔掂之時，大家或仲有些顧忌，但而家突然爆左個盈喜出來，現時股值ＰＥ６倍幾，發得盈喜的，最少賺多３成，那麼預期ＰＥ咪低得好可憐？

大戶要壓今次看似都唔係咁易啊，啲人唔知底牌時或有所顧忌！

等你越壓越開心，越插越興奮！

一陣畀人夾番上去，可能要調轉槍頭追番啲貨補倉了！


Yoki Wong