已沽出網龍（７７７）

昨天，已把網龍（７７７）沽清，平均價約＄１８個幾！

其實最初我的目標是錢＄２３左右，這是用估值的角度看，我看此股的頂位是在這裡，可是已接二連三有高層在＄２０邊沽貨，所以在一不離二，二不離三的情況下，我估班友都是在＄２０又派批貨出來！

此股，在這個位已是很高的位置，其實升到咁高已是超左我預期，因為我的所謂［倍升］，在時間上是指一年左右，而家兩個月已到位，所以早已心滿意足了！

由於此股就是勝在夠強，所以遲遲我都唔沽，直至此股連開二支陰燭，再加埋接二連三有高層在＄２０邊沽貨，才打消我本應想在＄２３沽貨的念頭。

我沽出的時間，大市情況不太好，當時見成朝衝了幾次都升唔番１０天線，於是才把貨沽緊啲，因為怕最後見財化水，而最近２天，都是在＄１９。６左右又見頂，好可能班友又係到沽貨，因為今次＄１９。６左右的位置，以現時恆指的現水平計，差不多是上次的廿邊了，所以不排除過兩日又有通告出！

沽出之後，又是要買番啲野，買來買去，又係這些，因為我當儲錢一樣，一有閒錢就當供股票般買。由於組合上，網龍（７７７）佔成１０％，由原先的５％倍升了變成１０％，所以可以買都幾隻了！

今次買的是華潤燃氣（１１９３），作價＄１９。９４，買入的原因好簡單，因為我冇！看了很多其他朋友關於燃氣股的分析，基本上隻隻都是有人看好，我自己本身較喜歡３８４及２６８８，原因是此兩隻的工業用戶比較多，而２６８８亦有很多加氣站，這正是肥豬肉所在，但看了一些資料，有人說出１１９３的毛利率竟然是高過隻２６８８，而我差唔多儲齊［燃氣股］的閃卡，所以冇理由唔買埋佢！早前炒到成廿幾蚊，之前十幾蚊又冇緣份買到，最近趁佢攪埋啲什麼［合併］，轆左落來，於是而家買番少少，做下倉底！

買了華潤燃氣（１１９３），基本上閃卡已儲齊，剩番兩隻ＳＩＺＥ較細的，所以大路上唔理佢邊隻好啲，我都會買中！

事實上，如果想博下個升幅較大的，可以考慮下隻６０３，因為這隻股ＳＩＺＥ較細，最近大摩為佢寫份吹水報告，都幾有ＰＯＩＮＴ，這隻６０３最近見有啲盤係大概＄１。６４左右壓住，按經驗看，應該有大戶收緊貨，所以亦可以順便借下人地個［假山］用一用！

除了買隻華潤燃氣（１１９３）外，今早又買了新天綠色能源（９５６），作價＄２。８１！

這隻９５６，今早無ＬＡ　ＬＡ特別低開近３％，問過經紀，又冇乜通告出，於是買番少少。點知畀個［勿格你］同埋［太極派］，亦可能係同埋一幫人或同一個人開兩個Ａ／Ｃ，聯手由朝砌到收市，收＄２。７１，始肯收手，成板沽盤都是這兩位人兄，做到出晒面，之後亦隨時在低位用過第二間證券行牌頭，收番啲貨又係佢！

最近隻９５６，在大市跌市下，此股算是很強，跌得遲又跌得少，彈時亦彈得快，在市況很差的環境下，尚在接近高位徘徊，應是強股所在，所以我選這隻加注！

最近其中一間成日打電話來問人駛唔駛借錢嘅花旗銀行亦為佢出左份吹水交膠：

《大行報告》花旗升新天綠色能源(00956.HK)目標價至3.3元 評級「買入」

花旗表示，上調新天綠色能源(00956.HK)目標價，由2.4元升至3.3元，認為該公司可受惠於2013年上半年急增的風電利用率。其氣體業務重點，由接駁費用轉移至輸氣量，料未來氣體量將逐漸回升。新天目前股價相當於2014年預測市盈率10倍，相對燃氣及風電同業現大幅折讓，維持「買入」評級。

新天首季發電量按年增60%，主要受新增產能及強勁的風力資源推動。雖然首季氣體增長按年少於10%，但下半年的燃氣輸配或增加，因井口價格調整後，新天將擴充其現有的輸送管道網絡。

該行指，外界較關注新天的高負債比率及資本需求。但該行預期，風電業務改善，將為新天帶來擴充所需的營運現金流。另外，風電項目獲批亦有助穩定未來2-3年的新增產能。

該行指，新天的上行催化劑，包括供氣恢復正常及完成液化天然氣項目；風電場安裝，及現有風電場發電增加。上調新天的2013/14盈測14%/8%，至5.96億及6.67億人民幣，預料今年氣體量按年增13%。

事實上，這隻新天綠色（９５６）在這類新能源股中，是較平宜的一隻，所以可炒的空間應會是較大！

除了這兩隻外，有一隻亦要加注，就是隻中集安瑞科（３８９９）！今天買入價是＄１０。５０！

此股同第一注的距離，差唔多升了成倍了，但我是選擇是加注，而唔係沽出，原因同最初買入的一樣，而買入後，觀察了此股咁耐，震倉都震左兩次啦，都震唔到我落車，所以我真是一個長線投資者啊！

此股最大的賣點，除了是什麼關於燃氣類配套用品的供應商，市場佔有率極高，最重要的是［貨乾］，此股時常都有很多買盤等待接貨，而沽盤長時間都是寥寥可數，只是小貓三幾隻，而且很多時都是要跳價才有足夠的貨！所以從經驗看，此股的貨是好乾的！最近在大跌市之下，此股亦是跌得少，跌得慢，又是跌得遲，但又彈得快的股票，所以我選這隻來加注！

［跟紅頂白］是我以往的投資法則，我覺得撈底不如追隻強的，近年已好少［海底撈月］，反而多了用［乘勝追擊］的方式去買，這兩隻９５６及３８９９，是最近大跌市之下，我看到比較強橫的，這是我的觀察分享！




YOKI WONG