合久必分

這篇文章，並不是講股票，而是講下我做緊那一行的密事！

今天收到風，話說現時好似在香港最巨規模的裝修公司，貌似連鎖店形式經營，開到［梗有一間係左近］那一間，正經歷地震，有幾間鋪的老闆要脫離這個好似［特許經營］的機構。

曾幾何時，在大約十多年前，在荃灣區有兩三間公司是近乎三分天下，一間正是我的，第二間，正是現時說好似開７－１１那一間，另一間就是個肥肥地戴個眼鏡成日上電視節目講設計那一間。

當年，最威風是我，因為所謂三分天下，其實那兩間都是日日畀我砌。今時今日，最失敗是我！但遊戲尚未完結，好劇還在後頭！我的沉淪年代，正是他們起飛之時，因為少了一個天敵。相反，我就衰過破產，日做夜做都是冇錢剩，因為要還債。

當然，這兩位老闆的秘密我是十分清楚，但亦唔打算公告天下，因為基本上他們亦沒有和我有什麼過唔去！

表面上，在唔知內情的街客來說，在唔知搵邊間公司做裝修的情況下，可能看下報紙媒體之類找合適的公司，當然好正常會找一間好似好大間，成個集團一樣的公司，因為會覺得這間公司很有規模，有較大的信心。

事實上，這個集團做最大老闆的，其實連一間房要用幾多卷牆紙都唔識計！他的成就是找了其他較細間，而又處於弱勢的裝修公司埋堆，用埋佢自己間公司個名，然後在某地產相關雜誌上大賣廣告，做到好似有好多間門市，好有規模咁！

實情係一個大老闆，夾埋好多間原本是弱勢的裝修公司，一齊用埋同一個公司名，而大老闆就會向這些［個體戶］抽水。而分店（即個體戶）是同其他分店，冇直接關係，形同７－１１！

為什麼我說這些都是原本為弱勢的裝修公司呢？

好簡單，如果你自己創業，可以獨當一面，你會唔會願意寄人籬下，連自己本身間公司個牌頭都冇埋，用埋人地個公司名，好明顯緊係冇乜生意先至埋堆啦！

當年，有間當時專賣熱水爐的電器公司想找我們負責他們的廚櫃！用佢間公司，ＸＸ寶的牌子名，作為ＸＸ寶廚櫃！

咪攪啦，咁咪即係我變相［被收購］？我地有客路，有生意，駛乜同你做姐！於是佢當然找過另一間公司，究竟咩公司先至肯落疊呢，要甘願畀人食埋，被拖佢幾個月數，即變相 finance埋人地，幫人打埋天下，你話係乜公司先肯掣先！

這位大老闆，真的什麼都唔識，原因佢跟本唔係做裝修的，實際是一個廚房佬！但其實佢已是好叻，因為找了咁多間公司仔埋堆，攪到一個好似大集團一樣的裝修公司，有十幾間分店，真係［梗有一間係左近］啊！

以我的線報，這幾年，這位大老闆真肥仔，靚錶當然濕濕碎，買層幾球既樓，［茄薯］一炮過，仲有係強國開埋超市。

我有很多師傅都好歌頌佢，時常說到這位大老闆唔駛做，賺幾多幾多等，更時常聳擁我開番門市！

當年，開創什麼［裝修套裝］的是我，因為之前香港是冇這個［噱頭］的，又是這樣，攪到個個都抄，而家打開份報紙，隨時都見到乜乜套裝等！

好多人只識抄功課，自己唔去思考及創新，好似買股票都是抄人買乜，就買乜，輸左就要聲討下人，但佢自己好可能冇用過自己個腦播！

這些抄人攪什麼［套裝］的，我好相信，他們係唔識點破解的方法，而且，佢地係唔知裝修套裝是問題所在，他們只識去抄，搬字過紙改下細節，就當係自己啲功課！

當年，我失敗的原因，其中一個原因，其實並不是主因，而是副因，就是貴租，當年，即十幾年前，我公司間鋪有人事之關照下，都要近４萬蚊租一個月，而家我好相信，而家這個鋪位最少都要十至十二萬蚊一個月租。

他們用門市去做生意，早在好多年前，我已經唔ＢＵＹ，所以他們不斷開鋪，用資金大賣廣告，去充大頭鬼，我早已唸過唔行這條舊路了。

相反，當年我的強弓利刀，今天已收起唔用，但唔係唔代表我唔識攻，因為係冇咁既必要。今天已經要做到唔停，日做夜做仲谷乜野呀，做好自己啲野就算啦。

而家我的策略是同佢剛剛相反，那個大老闆開鋪，大賣廣告，請ｓａｌｅｓ等，全部都要大花金錢去得一個客人，這些支出，就是［上客成本］。他們的［上客成本］其實是十分昂貴的，最後是會令他們的售價有很大的壓力。相反，我的上客成本是接近０，所以我才是 Cost Leader。因此，佢地如果同我鬥價，一定輸晒。這就是 Cost Leader 的優勢。由於我的成本較平，所以在同一個價錢下，我的質素一定是高過他們，如果在同一個質素下，我的價錢一定平過他們，這就是由 Cost 去衍生出另一個Ｐ的優勢，於是就有 Price 同埋 Product 兩個Ｐ，再由這兩個Ｐ，形成口碑，於是形成埋第三個Ｐ，就是 Promotion!

他們的強項，就是捉盲頭烏蠅，因為的而且確係有一些客人係唔知點搵，於是就信一間認為有一啲規模的公司去攪。Place and Promotion 是其中一項他們的優勢！可是，這兩個Ｐ，是建基於大洒金錢之上，所以這兩個 Ｐ，形成佢少了兩個 Price 同埋 Product 兩個Ｐ，於是最後輸埋第四個Ｐ，即是 Promotion.

這就是最簡單的同 Marketing 的四個Ｐ，去分析策略，雖然書中說的四個Ｐ不是這樣的，但我要創新下，用４個Ｐ，去說明Ｐ是可以相生相克的！

而我所知的情報，他們的［翻單］，即再有Ｒｅｆｅｒｒａｌ的百份比是很少的，相對我近八成，真是差天共地。所以他們最初是強，但是係唔持久的！

我的師傅都好睇好這間充大集團的公司，好似叫我學下佢咁！因為這幾年，我都好似好龜縮一樣，但我不想在這時有太大動作，最緊要係休養生息，什麼打來打去的，我冇乜興趣，我做我自己的！

橋是唔可以全單照抄的，每個人基本因素是不同，即等於人買乜股票亦唔係代表你可以買乜，大家持貨能力及承受風險能力都不同！

這個大老闆，沒有學識，沒有技術，但擁有最強的武器，就是錢！這個ＹＯＫＩ　ＷＯＮＧ，雖則有點少學識，有些少技術，可是最大的缺點是冇錢。

所以，人地用銀彈戰術，是否我又要用銀彈戰術？世上只有用自己的優點去打人地的缺點，而唔會用自己的缺點去打人地個優點！

在中日戰爭時期，毛澤東說過，日本相對中國是強，中國是弱！但是，日本相對中國，日本是小，中國是大！

所以毛澤東已經指出一點，中國的優勢並不是在於強弱方面，而是大小方面。最後賽果是日本在二次大戰後期，佔領中國很多地方，由一個細小島國去管理一個咁大的地方，就開始力有不抵，舉步維艱。

孫子曰：故備前則後寡，備後則前寡，備左則右寡，備右則左寡，無所不備，則無所不寡。寡者，備人者也；眾者，使人備己者也 。最後日本雖然佔領了很多中國的地方，但是由於實力分散了，就成為［無所不寡］！而八路軍的［麻雀戰］，就是要日軍［寡者，備人者也；眾者，使人備己者也！］

他們越要開多門市，就是打［陣地戰］，而你打［陣地戰］，我唔同你打，我就相反同你打［地道戰］。這是大家基本因素的唔同，於是就要用唔同戰術，而不是人做乜，我做乜，只識靠抄！

現時我的生意同一間門市唔係差好多了，但我的 Overhead 是接近０啊，相反，在租金，人工，乜費都上升的時候，他們的壓力是好大的，我好肯定，迫於無奈，這些成本上的上升，一定會轉嫁落客戶身上。

所以當乜成本都上升的時候，和我的差距就越大，所以我是租金上升的受惠股，而他們就是受災股。但他們學我唔用鋪頭接生意又唔得啊，因為他們早已習慣做門市客，已經好倚賴個鋪頭同埋啲廣告啊！

內地新一［出］的［地道戰］，劇中描寫了日本學了土八路的［地道戰］去打番土八路，點知最後都係畀土八路玩死！

表面上，他們有很多門市，實質是充砲艇，一個大老闆把原先公司的牌頭攪大，在走多出來收［O靚］，然後抽水，之後唸住乜都唔跟，唔駛做，等收錢，而分店與分店之間又無直接關係，只是大家有個共同的合顆人，情如二奶，三奶，四奶都沒有什麼直接關係，只係大家有個共同老公。所以表面上是一間大公司，實質是貌合神離，各懷鬼胎，於是就有［矛盾］產生！這表面上是毛澤東所說的人民內容矛盾，實際是因利益關係，最後發展成為人民敵我矛盾！

以上的說話，就是幾個月前，我有一個師傅歌頌緊這間公司時，聳擁我開鋪頭時，我對他的回應！

點知，今天收到消息，這個機構大地震了，要分裂了，正應晒我幾個月前的預測。

乜成本都升，就是我幾年前想出來的［大趨勢］，就是要基於這個［大趨勢］的假設，去為自己有一個適當的部署！


YOKI WONG