歧視及所謂的保安理由！

之前曾經說過，我曾經教過下夜校，當年曾經教過的科目是會計，成本會計及市場學。

其實，我是十分喜歡當老師的，不過當年因工作極度繁忙之下，兼顧不到，才被當時公司的顆伴慫恿之下辭了這份工作，到了現在真是十分後悔及遺憾。如果有機會再當教師，就好了！

其實，大學畢業後，我寫了最多的求職信就是去當教師。可是，只是有兩三封有得去見，教中學，又可能我會考冇Ａ，較初中，又可能我中英文唔得，因為讀文科的我，中學會考時，六科有２０分，即２Ｂ４Ｃ，但好差勁地中文及英文只是Ｄ左。可能就此同當教師就冇乜緣。

曾幾何時，當年入大學都不是很像現在那麼容易，當時我學校由中五能直升到中六，只有唔夠２成人。當中Ｆ６是有１班文，１班理，３班中五文科同學仔，最後得十幾人升到中六文科，而即使你讀到預科，亦唔係代表你可以一定入到大學，當年只是得幾個順利入到大學！

而當年入不到大學，才走去讀師範的，就絕大多數可以去當教師，當然，而家當教師未必好，因為隨時畀人雞！聽講，而家當教師唔係好高人工啊，但起碼行出來，企企理理，人地問你做什麼，你可以說是當教師，真是有點好似好有文化水平的人啊！

而家人地問我，你做什麼呀？

我真係唔知點答佢，因為當裝修的，已被標籤左［冇文化］！

前幾年，去了一個裝修地盤，叫都會駅，入去屋苑，當然要畀人炒ＩＤ才可以入去！

在我之前登記的，應該是賓賓印印之類，都是要登記的，在我正前面的是一個十幾歲的女仔，應該是上去當補習的，竟然唔駛登記，而我當然要畀人抄ＩＤ才可以放行啦！

好明顯，這個食蕉係睇人而決定登唔登記人ＩＤ，而不是跟規則，凡入屋苑內工作的都要登記身份證。賓賓印印要抄，裝修佬要抄，點解去補習的唔駛抄？

抄人身份證時，就是大條道理說是屋苑保安為理由！

是不是代表當補習的就一定是好人？做裝修的一定是潛在壞人？

是不是女人就是代表是好人？男人就是潛在壞人？

是不是後生啲就是好人？老啲就是潛在壞人？

好明顯，這已涉及［職業歧視］［性別歧視］或是［年齡歧視］，甚至是［種族歧視，對賓賓印印來說］！

食蕉被我 CHALLENGE下就是說認識她的。

於是我問，這位小姐叫乜名呀？

當然答唔出！

這位小姐去邊個單位呀？

又是答唔出！

你肯唔肯定這位小姐是不是上門補習呀？

當然，更加是唔肯定！

唔講大家唔知，其實我在中四時，即成廿幾年前，已同同學仔開左一間補習介紹中心，專門幫家長找補習教師上門補習，然後抽佣。當時收入都不錯吧，平均一個月都搵到四千幾蚊！

而當時我老豆，一個月人工都係咁上下咋。

究竟補習教師是否一定心地善良呢？

當然唔係啦，都有總有一些是想走數唔畀佣啊，是不是補習教師一定唔係壞人？

一個口口聲聲以屋苑保安為理由而要抄人身份證的食蕉，在所謂［認識］而實質唔［認識］的情況下可以放陌生人入屋苑，這個屋苑的所謂保安，實際又是做秀給業主看，你們交管理費是值得的！

大家都可能知道裝修是要交按金去管理處！而裝修師傅又是要向管理處申請一張叫［工作證］的物體才可以去開工！

好明顯，又是要［屋苑保安］為理由！

為何抄身份證唔得呢？

可能是因為佢要肯定你是這間裝修公司的員工委派過來開工的。但實情是很多時都唔知邊個來開工啊，例如，清拆工程判了給專門當清拆的判頭來開工，判頭帶邊個伙記去開工，裝修公司唔知啊，亦相信冇邊間公司有咁多時間，臨開工前一晚去問判頭拿會去開工的伙記拿ＩＤ號碼，幫佢攪工作證啊，最後咪又係抄ＩＤ！

事實上，都是［上有政策］［下有對策］，最後都是唔駛［工作證］就可以上去，都只是抄ＩＤ解決！所以［工作證］是［保安理由］，最後又是做秀！

拿工作證的，裝修工人是要畀按金的，好正常，因為唔見左是要扣裝修按金的！而通常工作證的按金是＄２０至＄５０左右，我覺得算是合理！

可是，有些屋苑是利用這個保安理由去［裝］人達到［屈錢］為目的！

這兩個屋苑，分別是杏花邨及海怡半島！

通常工作證是拿一張就可以，但是杏花邨是要拿２張的，其中１張是自己袋住，另外１張是出入要交去樓下座頭。一張工作證幾＄，我唔太記得了，好似是＄１００－＄２００一張，即是說，單是工作證，每個工人就是要花＄２００－＄４００了。

當然，工作證是可以退錢的，不過啲師傅時常就要提心吊膽千祈唔好唔見啊！

問題是，為何全港屋苑的工作證只是要做一張，為何杏花邨就要做兩張？

為何全港屋苑都是＄２０－＄５０一張，為何杏花邨要＄１００定係＄２００一張？

管理處當然是以［保安］為理由啦！

問題是杏花邨是港鐵旗下管理的屋苑，其他的如綠楊新邨，德福花園等都是由港鐵管理，為何這兩個屋苑同杏花邨唔同制度？

是否住杏花邨的巴閉啲，住綠楊新邨，德福花園的就ＣＨＥＡＰ啲？

是否住杏花邨仲巴閉過住豪宅，佢地啲工作證應該是冠絕全港啊！

如果杏花邨的保安才是夠水準，真正為杏花邨居民的保安著想，是否是說出同是港鐵管理的物業如綠楊新邨等，求求其其就可以呢？

這基本上都是管理處答覆唔到的問題，佢地大石［澤］死蟹，跟本是冇監管，且投訴無門！

至於海怡半島方面，工作證也好似是五十蚊的，但是是有一條［惡法］！

［惡法］是什麼呢？

例如，你接了一個裝修地盤，有清拆，水電，泥水，木工，油漆等師傅，每人去管理處辦一張工作證，費用＄５０！

好簡單，師傅做完師傅自己工作，正常交番張工作證，收番＄５０是不是好合理？

問題就是在這裡，就是唔可以！

是幾時先至可以呢？

就是要個地盤做完，個業主去管理處退番啲按金，先至可以辦理工作證退款手續！
即是說，如果做泥水的，早已完左工走左，要等到成單工程完工後，才可以專程走去鴨脷洲攞番嗰五十蚊！

單是搭車，來回隨時至少都要廿幾蚊，仲有時間呢？

所以很多師傅都唔會專程去攞番嗰五十蚊，於是畀佢食左！

當然，你亦可以話夾埋其他師傅一次過去攞番啦！

那麼就要升祈唔好有其中一個師傅唔見左啊，因為要退錢，出８張工作證，就要擰番８張出來，７張係唔收的，所以只要有一張唔見左，其他的７張都唔駛攞番錢，又畀人食埋！

你唸住一完工即時去攞番工作證啲錢啦！

唔好意思啊，業主未辦裝修按金退款手續，未做得住啊。

業主都未可以即時退到按金啊，因為管理處要睇下在裝修期間有冇地方因為裝修時損毀要賠或業主做了一些遺規工程如鋁窗轉左款色間格等，所以又要一輪手續及時間，要有專業人任來看看駛唔駛扣按金，才可以退番裝修按金給個客。

講來講去，就是要你第二日專程走去鴨脷洲收番工作證啲錢，仲要先前夾好晒所有其他師傅的工作證，仲要千祈唔好有一個拖衰家唔見左，否則一毛子都收唔番！

好合理的情況，唔見左一張工作證，咪最好扣一張錢，為何學埋［秦朝］時的惡法［連坐法］一樣，一人犯法，全族受罪！

YOKI WONG