相反操作，先沽後買

這兩天，很多二三線股都有震倉或高位回套行動。

尤其是在近兩三個月升得較多的股份，所以我的組合中，今天都有幾隻畀人移動。

這是好正常，在大趨勢下，都有一些小趨勢，只要是大方向大趨勢冇錯，自然可以平安到步。壓力是源於你從那一個角度去看問題，世界上我未見過一隻只有升，而不會跌的股票。以前有一隻，就是明珠興業（９８８），這隻股票，成廿年前我的愛股，在未爆煲之前差不多是唔會跌的，十四天有十二天都是升，只有兩天是冇起跌！這是完全唔正常的莊家股，全是人為操縱股價，而當時我亦明知都走入去，因為明知日日升冇跌，點解唔走入去？

不過，花無百日紅，最後都要輸番畀佢，就是有了這個失敗之母，所以日後的中國林大（９１０），我就見好就收了！

如果一隻股票，從十年圖或五年圖看，都是大趨勢向上，那隻股票應該是一隻正在成長中的股，但在十年圖或五年圖中的持續上升，並不是代表之間唔會有一段跌幅。所以如果你好在乎那一段跌幅，你跟本談唔上自己是長線投資，即座貨！你只是一個炒家！

如果從大圖看是持續向上的，這隻股應該是可以拿來［座］，反之，如果都是橫行，上上落落，這隻股只是可以拿來炒波幅，如果持續下跌的，你買都是你傻，贏左是你眼光獨到或你好好彩！

你是投資者，抑或是炒家，並不重要，最重要你是有冇條件成為一個投資者，或是一個炒家！

如果你是投資者，你應該要有耐性，亦要有好的ＥＱ，平時多做功課，對自己要有信心，有不錯的分析能力，才可以成功！

如果你是炒家，你不需要有耐性，最緊要是［身手敏捷］！長遠分析在此不是很重要，最重要的是有市場觀察力，才可以洞悉先機！

昨天，華電福新（８１６）有近５％的下跌，由於時段正在我忙緊中，所以不知道原因，到家中，找資料，知道此股公佈季度業績唔多靚仔，最後在港交所網頁找到該公司條數的副本。

當中有很多名目，當然從字面上知道是什麼來的，但實際上這些字面好空泛，所以實際唔知道是什麼，總之有幾條大數，如稅務上升左許多，財務支出可能是指利息方面又上升左，而收入又少左，而成本又多左。。。於是埋單賺少左！

在這個信訊環境下，是應該沽貨，因為手頭上的資料是支持我這個行動，所以原本準備雞啼價即沽，可是遇上黑雨！下午開市１：００，我早５分鐘已ＳＴＡＮＤ　ＢＹ，並見有些反彈，即時在＄２。５０全數沽出，之後又趕住番工！

下午茶時間，又去按下機，見到很多二三線股都被放量震倉，當時正想撈隻中國燃氣（３８４），因為一來我少貨，早已上加啲，二來近幾日都做左一些功課，而中國燃氣（３８４）這隻股，很多主要股東都是在＄６。８左右上車或加注，再加上這隻股已在保力加通道下方，所以正是趁亂買番一點！

點知見到隻８１６畀沽家越沽越興奮，跟住嘻嘻哈哈；入左貨輸左錢的，自然越看越心嗡，跟住媽媽叉叉！見到要跌超過６％，好彩今天走得快，狠，準！

在歎緊一盅兩件之時，按按下手機，見到以下新消息，發現：

《大行報告》美銀美林升華電福新(00816.HK)目標價至2.75元 評級「買入」

2013-05-22

美銀美林表示，華電福新(00816.HK)首季盈利2.24億人民幣，年前同期獲利4.17億人民幣。撇除特殊收益，福新首季經常性盈利按年持平，低過預期，主要由於水電產量按年降幅高過預期，加上風電場利用時數按年升5-6%，低過該行預期的7%，利息開支亦較預期高。 

華電福新首季水電量低過預期，是由於降雨延遲至5月。福新表示，自5月開始，水量已大幅回升，並預料今年水電量將達80億千瓦時，超出該行預期。該行指，水電價格每上調1%，福新今年純利將增1%。風電方面，位於新疆和甘肅的風電場利用率，將於今年第四季或明年首季反彈，利用率每增1%，福新今年每股盈測將增5.3%。

該行下調華電福新2013-14每股盈測8%，以反映首季業績。福新現價相當於2013-14市盈率的11.6-9.4倍，較內地及全球主要同業低，但其2013-14資本收益率為6.1-6.5%，高過全球同業，與內地同業水平一致。目標價由2.55元升至2.75元，評級維持「買入」。

原來營利下跌是這一回事，當時股價正是跌至＄２。３，於是［目及］了一陣，股價由＄２。３１，一格一格抽上，於是在＄２。３３買番今天沽的，點知又回番＄２。３１左右，跟住又過左下午茶時間，繼續開工，冇時間睇！

當我是炒家的時間，致勝之道是快，狠，準，［快］者，早有準備，因為開市前已準備出擊，一手按機，一手按電話；［狠］者，一要三心兩意，全力按部署辦事；［準］者，前一天做的功課自然要準，否則就變成快，狠，蠢！

快，所以要捕住價位，快攻！當然，如果時間不許可，當炒家就自然與你無緣，因為你［目及］唔實個市。

如果你跟本［目及］唔到個市，你已執輸過人，你點學人做炒家？

所以做投資者，才是你的選擇！

而做投資者，有冇耐性，有唔肯做功課，成功很難了，唔通天天幸運之神都眷顧你嗎？

投資股票很像賽馬，同時有很多人想在此賺錢，可是同是有一少撮人掌握了一些內幕資訊，正如最後幾秒著啡燈，就超過一半會得手。你同我九成九都不是那一少撮人，正如早有春江鴨好似知道８１６條數唔靚仔一樣，早了我一天出貨！

何哉？可怨什麼，因為在基本條件上，你不是那一少撮人，唯一可做到的，就是在你知道之後拿出最快的反應出來！

有人說我介紹過１０７２及２７２２，這兩隻我早已在＄２２－＄２３沽清１０７２，並在＄２。６－＄２。７之間沽清２７２２，所有沽出早已聲明左了！

而家兩隻都未升番我沽的價，如果你當初因為我而跟我買，你在＄２前已入貨買入２７２２，點解你見我在＄２。６－＄２。７沽你而又唔走，自己買貴左，而又沽得慢，究竟是誰的問題呢？還揸到而家得番＄１幾，在此怨天尤人呢？

隻東方電氣（１０７２）由日本海嘯問題拖左佢落水，老實說，我真係預測唔到地震啊，在發生後，第二天已即時沽出大部份，跟住過多幾天再沽埋少數的，點解你因我而買，又不因我而沽呢？

如果你當初跟我沽，你今天會否來多謝我呢？問題在於你高過我買，更上左車唔識落車，人地話落車，自己都唔落車的問題！

如果你真的當初與我同時間買入１０７２，就算臨尾因海嘯要輸番少少，最後埋單都是贏播，點解人地贏錢，同一隻股，你又要輸錢呢？

［馬輝］騎隻［老友記］就贏到，點解［告東尼］騎同一隻馬又贏唔到呢？唔通［告仔］要賴馬輝，定賴隻［老友記］呢？


YOKI WONG