2016年1月4日 星期一

新年開波滿缸紅 一個決定天與地


今日為2016年首個交易日,筆者在此先祝各位看官在新的一年都能早着先鞭,快人一步!

新年雖至,但氣氛不能為疲弱的股市充喜。由於上個交易日歐美股市尾市已倒水,加上內地公佈上年12月份財新製造業PMI降至48.2(見附圖),已連續十個月低於50的臨界值,且差過市場預期的48.9,跟據財新智庫首席經濟學家何帆表示,15年12月財新中國制造業PMI反彈趨勢受阻,預示出經濟繼續面臨較大下行壓力!



由於經濟復甦憧憬幻滅,引致A股暴跌,午後滬深300指數挫7%,觸發全日熔斷。本港股市在這個宏觀大環境下,恆指一開市已低開131點,隨即越跌越有,到下午2點25分跌至全日最低位21227,才開始有技術性反彈,但升至21400已無力為繼,並於21300點左右拉鋸至收市。最終恆生指數全日收報21327點,大跌587點。常用的平均線全線失守,14天RSI跌至36.6,自上年度12月初跌穿50開始,只有兩個交易日14天RSI企於50樓上,整體大市弱勢明顯,MACD早前升穿EMA(9)後,再次轉向,有趨勢再次跌穿EMA(9)。國指更大插349點,收報9311。升市少成交,跌市大成交,今天埋單成交金額738億元。

從圖表觀之,整體走勢未擺脫下降通道,早前技術性反彈,可能又是一個製造出來的技術性反彈請君入甕。筆者至今仍堅持自己想法,由於未來日子沒有一個很大的利好消息配合炒上,企業業績成績表很大機會都會令投資者失望,3,4月為成績表派發期,醜婦終需見家翁,業績冇野好炒,唔通又講深港通?人仔匯價下跌,國家已怕資金會外流,而家攪深港通,究竟是幫助資金流入定流出?5窮6絕7翻身,看似仲有半年捱,捱過也未必代表會V形上番,大戶在跌定後,會在大市未明朗時慢慢收貨,市況應會出現一段橫行整固收貨期,大戶殺了個市落來,成個魚缸都是大閘蟹,大戶唔似咁蠢推番個價上去畀你走,因此筆者唔相信係短時間會再次做上。大戶都是取易不取難,任何好消息,一定要看其利好的持續性才是真火,尤其是很牽強的所謂好消息,很多都是大戶炮掣出來的假像!看劇情發展,市況暫時仍是有反彈冇轉勢格局,指數將近21000點或會再有一個技術性反彈。

股市雖未至人間煉獄,但隨時好戲盡在後頭。筆者在26000點走人,20000點再全力入市,趁雙降好消息,這個浪殺番佢60,由於想搵多些快錢買樓,所以甘願做個渡火海的人,逃出火海又衝番入去,點知畀佢殺番成20,筆者最終借人民幣入SDR的好消息教腳走人,退出股市,並全身投入中山的樓市。

中山樓市由之前:

~乜你地咁睇好中山嗎?這處唔會升架!

~中山的庫存,真要多謝你們香港同胞了。。。

~中山大把樓啦,中山是個死城。。。

發展到今天:

~火炬區庫存被深圳人掃至0!

~海茵新城出現排隊搶購人龍,一日唔夠打光!

~以前冇人要的西區,由4,5000一方,夠薑而家開6500!

~金域藍灣低層垃圾池附近都有人要,新一期單位已叫9500至10000一方,相比6月時只是唔夠7000一方!

~港口保利國際廣場,幾個月前都要3日賣光一棟,發展到最近1小時就打光!

~遠洋新悅樓下的大信新都會快開張,最後一個單位3個人爭,最終大打出手爭樓收場!

~遠洋系所有樓盤即時封盤,再提價重新發售!

投資能否獲厚利,首要條件當然好在乎你能否預知未來,在眾人看不到時,你看到。其次是你能否知行合一,唔係得個睇字,得個講字!看準後,是否能兵貴神速,快人一步,出手夠唔夠凶狠的問題!




YOKI WONG


更多精彩文章盡在大方向