2016年1月8日 星期五

傻佬自作陰謀論 故事虛構會當真

此文章已於2015年12月8日於大方向發表

美股前日大升400點,恆指只高開100點,最終倒跌收場。昨日美股稍作回吐,港股弱勢即時現形!恆指一早即低開144點,22000好友不戰而降,淡友輕易插穿!大市再借內地11月出口同比跌幅3.7%的消息,隊多大市兩野,恆指反覆向下,最低曾見21765點,跌穿11月中及11月下旬形成的雙底21907的位置。尾市大戶托番高點作裝飾櫥窗,扮晒跌幅略為收窄,大市見底回升。最終恆指全日跌298點,收報21905,大戶砌番上接近上次雙頂位置,技術走勢裝飾過收番好樣啲。國指跌137點,報9660,成交增至762億元。

前幾日,筆者也要好好把握好消息出貨。筆者持貨並不算很多,只有幾球野咁大把,但由於市場並沒有咁多買盤畀我話掟就掟,咁既市況,一炮過將啲貨擺出來,實嚇到三姑六婆,咁既時勢,好難扮擺假山呃人,傻仔唔會信係假山,點會係度山下種田?到時引埋其他人同我爭住沽,咁就出不到好價錢了!於是我唯有示人以弱,好似搣餅乾咁,續啲續啲出,咁既環境,傻仔好難搵,扮晒可憐,只有幾條魚上釣,最終幾球野,也要出足半日才出得晒!

好似我呢啲小散戶咁,都要出成半日,咁大戶呢?佢地班大帝既貨,隨時是我幾十倍,幾百倍,甚至幾千倍,佢地真係要擺啲貨出來,一定嚇到我呢啲小散魂飛魄散,仲唔同佢爭住沽咩?所以大戶都是要趁好消息出貨!

第一個好消息,唔駛講梗係雙降啦!呀爺派個好消息,一定引到班傻仔追貨,到時又可扮晒野,示人以弱,畀班傻仔掃,等佢地自我感覺良好,開心一陣!當然,理想只終都是你想,呀爺個好消息,畀一些稍有智慧老散踢爆,大戶當然唔多LI KE!但冇佢符!曾經唸過 Call 班財演出來唱好,學共產黨嗰招反制手段。但近牌老細生意又真係麻麻,想 CUT 下 Budget,慳得就慳。財演見老細冇 Fall 水,唔多識 Do !梗係唔做野啦,電台訪問時,咪扮下有良心咁講下實話囉!話晒都要顧下公眾形象。

大戶當然不是一個打晒骰,當中有好多不同派系同勢力係入面,當然有些更是敵對派系,幾班不同派系既大柴狼,見班傻仔唔敢再追,咁啲貨咪唔駛出?你唔出,隔離肥龍,大少都要出喎!於是當啲傻仔開始冇銀時,就要出[回馬槍]見錢收錢啦,真不知道何日君再來!

咁既時勢,仲邊度有咁多好消息架?時間越來越緊迫,冇好消息,好難出喎老細!

哈哈,做得大戶,智慧邊會好似啲老散咁蠢先得架?三十六計,都有招叫無中生有啦,於是有個師爺就度到條好橋,摷番N咁耐的深港通,搭通天地線,找班靚仔放風出去,咁咪得囉!當然,而家世界難撈,傻仔越來越難搵,因好多傻仔都冇錢了,冇咁傻的又去左中山買樓,啲錢唔係股市。於是又要重覆上次玩法,一見傻仔唔追,又見錢收錢!

經過兩波出貨,老細話仲有幾百億貨出唔到,於是叫班師爺想下計仔。於是基於老細壓力很大的情況下,有個師爺獻計!師爺說,重賞之下必有勇夫!老細問師爺,此話何解?願聞其詳!師爺:不如叫大摩頭幫下手啦,叫佢唱好下,咁我地。。。哈哈!老細急不及待,即刻打畀大摩頭,叫佢找個借口出來唱好!只終,大摩頭同老細都互相利用左咁耐,基於半友半客的關係,不得不仗義相助,於是大摩頭就指示班靚,叫發消息出去MSCI要爭持!

當然玩法同上次一樣,傻仔越來越少,一見冇人追,就見錢收錢!因很多去左中山買樓去了,殘餘舊部,剩番唔係好多可以食了!所以每次見到好消息,老細一定扎衡馬,等魚上釣。老細有一個得力助手,同老細單聲,時間無多,人仔入SDR可能是 Last Chance !於是老細當然把握最後一個逃生門,放得幾多得幾多啦!

講咁耐,時間無多?究竟咩事咁趕呀?

之唔係美國就加息囉!

美國加息,萬劍歸宗走向美元,你唔走,大把人都要走啊,很多市場啲熱錢,將會回番去美國去了。

美國加息,咁又會點?因為是有連鎖反應!

首先,美元轉強,一個強,即另一個就相對弱啦,即是說,絕大部份貨幣都是匯價下跌,啲熱錢唔走,匯價已先蝕死!

其次,很多商品都是以美元計價,美元上升,即是代表大宗商品價格下跌!以現時經濟咁疲弱,原材料價格下跌,只會加大通縮風險,經濟只會更差,在通縮的環境下,生意難做,投資股票當投資別人啲生意,風險高得多了。

再者,很多國家,尤其是新興國家,都是靠出口這些大宗商品而賺取外匯,商品價格下跌,對這些國家收入有很大影響,而且,不知道這些國家外債有幾多,其本國貨幣貶值的情況下,其財政情況及償還外債能力將會大打折扣,或成另一隻黑天鵝。

大戶同散戶的最大分別是什麼?

當然是錢唔同,唔駛講啦!

最大分別是散戶很願意冒風險,因橫又死,直又死,梗想博一鋪!大戶則唔想同你博,還掂嬴左,最梗要打穩陣波!

香港有個什麼按通漲掛勾的政府債券,叫做IBOND,很多散戶一抽到就放!

咁邊個買?

你懂的!

以上故事,純屬虛構,如有雷同,實屬巧合!




YOKI WONG

2 則留言:

loveckw! 提到...

師傅,明白了。

tommy wan 提到...

多謝分享