今日是猴年的第一個交易日，筆者僅代表［大方向］及［八路富豪］恭祝各位今年逢凶化吉，化險為夷，平安過渡！
今年猴年的太歲是管仲，管仲是中國歷史中古代四大名相，與伊尹，周公旦，諸葛亮齊名。管仲的命運不是一開始就很順利，其命基本上是大器晚成！年輕是家境貧困，及後認識了一個叫鮑叔牙的好朋友，原來是管仲一生中最重要的貴人，幫其化險為夷，最後更幫管仲成為春秋戰國中齊國的丞相。管仲仕齊後，推行大力改革，尤其是商業方面。所以大家或可以借今年太歲係邊個，可以理解猴年為先苦後甜之局，但轉捩點一定要有這個［貴人］出現，究竟［貴人］是誰？年尾會否好似管仲咁有大改革出現？唔好問我，哈哈！大家都在看戲吧！
從猴年的立春的四柱八字中，［金］［火］各有３個，［土］［木］各有１個，唯獨是冇水，即係今個猴年是五行欠水之局，看到年柱：丙申和月柱：庚寅，出現［天尅地沖，大沖驛馬］之局，主要是講地面，地底，海上等會出現事故，尤其是關於交通方面。在［沖驛馬］［五行又欠水］再加上［丙申］，有燥底仲要冇水克，咁這隻猴子應該是一隻燥上加燥的燥火馬騮！燥火馬騮會點？到處搗亂，社會動盪不安是也！
看通勝的丙申春牛圖，則見：春雨已逢淫雨降，秋冬奚竟旱乾遭。基本上睇字面都知道點解，就是預示今年春夏某些地區將因不斷降雨，以致一些地方出現水患，但到了秋冬兩季，某些地方卻出現旱情！
查下網上資料，看２０１６年的氣侯預測，今年初是厄爾尼諾現象尾聲階段，到９月左右轉至拉尼娜現象，即是由水患轉至乾旱，如果今時今日的通勝唔係睇住天文台來寫野，而是用古時的天文歷法去推算，都咪話啲古老野唔犀利！
由於通勝指出今年先澇後旱，故［農夫陌上空勤苦，蠶婦閏中枉告勞］！中國以前是一個農業社會，農業的收成，就是預示一年的經濟情況，咁既字面，好易都解到農夫同蠶婦今年都是白做，今年經濟都係。。。你懂的！通勝更指出：六畜多災氣，人民率暴終，此話解作將有瘟疫發生，仲會危害到人命。［歲是丙申成讖語，人生如此也如何？］即是告誡大家這是天意，人活在這個空間上，基本上可做的亦不多，各安天命吧！
說回股市，中港兩地新春假期休市期間，日本仔那邊臨放價大挫近千點，好在歐美股市相對冇跌得咁誇張，所以猴年開市首個交易日，港股只是大幅裂口低開８０１點，報１８４８６點，即是說一開波已是５２周新低！今次大戶唔一開波插你１０００點已是好畀面！基本上，成個朝早，跌幅都是維持８００點左右，早上曾有一個反彈，是有些人認為可能開得過低，於是走去博反彈，最勁都是將指數推番上１８６２７，已是全日最高位，之後當然又是無力為繼，指數午後曾低見１８４４６，是今年新低，亦是３年半以來的低位。恆指最終全日跌７４２點，以百份比計，近４％，收報１８５４５點。指數低於所有平均線，１４天ＲＳＩ見３５，趨勢再度轉為向下，自上年１２月下旬跌穿５０之後，１４天ＲＳＩ未曾升回５０樓上，先前係威係勢的反彈，好友也是技窮於此。ＭＡＣＤ回復先前向下意圖，有想插穿ＥＭＡ（９）的趨勢。國指則跌３９６點，跑輸大市，跌幅近５％，８０００點大關收守，收報７６５７點。大市成交額６６９億元。
YOKI WONG
２０１６年２月１１日＠大方向
沒有留言:
張貼留言