昨天本欄曾指出，恆生指數跌到２１０００點左右，或將出現一個技術反彈，可能給大家一個逃生門。
最終結果是今天跌近２１０００點也沒有任何想彈的跡象，話穿就穿，要跌到２０９４７（全日低位）才開始有點支持，那個位大概是１４天ＲＳＩ跌到３０的位置，才象徵式叫做彈下，但彈的幅度極少，只是下午兩點鐘前去到２１０７０點左右，已經冇力調頭再插過。
市況點差？
可從以下跡象觀之：
第一，如果２１０００真是支持好大，未到２１０００已開始彈，因有人會偷步去博！
第二，如果是見底的彈，冇可能彈得咁少就調轉頭插過！
如果２１０００點，大戶都唔肯砌番上高啲，最大可能是因為不單止是只有一班大戶想沽，而是好多班不同派系的大戶都是想沽，冇人願意做這個傻仔托住個市畀人出貨！
今日畀佢最叻博反彈嗰個，當佢由１１：００左右最低位撈底，揸到近１４：００最高位食，基本上都是冇肉食，叫做扣埋手續費賺包維他奶！而如果操作唔到這個高難度動作，今日邊個入市博反彈的，相信都全部都蕉埋！
環球地緣政治風險增加，中東兩大派系什葉派及遜尼派過千年的唔啱啞，已由檯底想打到上檯面！中東亂到七彩，四大勢力：ＩＳ，俄羅斯，伊朗（什葉派），沙特（遜尼派＋美國為首的西方勢力）大混戰！有人想趁火打劫，混水摸魚，當然亦有人想穩穩定定，幕後仲度緊點樣取勢力平衡！日本仔同韓國佬檯底傾掂惠安婦問題，一心想攪關係正常化，司馬昭之心路人皆知，想從已開始親中的韓國拉攏回來自己身邊，朝鮮見唔亂就難搵著數，抑或幕後原有金主指使，金仔又玩下氫彈倒亂檔，最後兩大代理人中國同美國又要檯底傾計！孫子曰：敵則能分之，兩個火頭，美帝兩頭騰，顧此失彼！台灣想同學韓國佬同日本仔講數，日本人睇台灣佬唔起，睬佢都有味。美帝手執４條Ａ：美元，軍事，石油，科技！大陸佬手牌唔夠人大，唔夠膽同美帝ＳＨＯＷ ＨＡＮＤ，焗住做多陣契弟。中俄唇齒相依，深明唇亡齒寒大道理，最近窮到發瘟的俄羅斯好在有大陸佬接濟，未死得住，美國同沙特夾計係石油條數玩野，想玩謝俄羅斯，普京就同你玩敵人支持我反對，敵人反對我支持，大攪對抗。大陸拍住俄羅斯，有穩定能源供應，照顧到大後方，才可牽制下美帝，中俄有著共同敵人，自然 Friend 過打 Band。
大戶大把錢，在咁複雜既情況，唔會同你顛，最緊要放啲錢去平安全地方，暫時睇牌面，最安全仲係美國，所以美國加息，將有更多錢流入美元，這上筆者認為主力資金的流動［大趨勢］！搵少啲，唔駛死，還掂啲錢夠駛一百幾十世，佢地心態，最緊要唔好輸！所以市場接受風險胃納一定下降，大戶走去避險！
咁咩人咁既時候走去博？
第一，是當股票投資是買大細，開左咁多鋪小，都應開鋪大掛？
第二，好有賭癮的，唔賭會有野咬佢嗰啲
第三，好等錢駛嗰啲，正財又撈唔掂，成日唸住博下有冇橫財，最好博到之後唔駛做嗰啲
第四，天生異品，思想前衛，標奇立異，專要同大部份人思想不同，這些人喜歡將條底褲著係面，才突顯到佢別樹一格。
今日收市，最後一分鐘，例牌菜好淡雙方博拳，好友臨尾發力，盡地一鋪，都無法收在２１０００樓上，淡友窮凶極惡，唔似有人咁蠢係這些位去以卵擊石，劇情寫到呢度，下一兩集，可能要寫２００００點好友絕地大決戰。。。
YOKI WONG
２０１６年１月７日＠大方向
沒有留言:
張貼留言