港股昨日借隨外圍造好刺激，一起步已裂口高開２３５點，其後持續升勢，早市最多曾升３７０點，高見２２５５９後開始有回套，但指數見２２４００點前有買盤支持，指數再度回升，最終恆生指數全日升３１１點，收報２２５００點，指數收市企穩１０天線樓上，ＭＡＣＤ已開始出現轉向勢頭，指數現正迫近１０月下旬至今的下降通道頂部，似等待機會突破。然而，今天成交只有６６８億，今天升市及昨天的跌市成交都不足７００億，市況淡靜，大市動力未見充足。
昨天乘車經過旺角砵蘭街，賣裝飾材料那一段，交通甚為暢通，聽友人說，最近生意差了一點。以筆者從事該行生意廿年經驗，可以好肯定旺角砵蘭街是香港經濟的寒暑表。唔好以為樓市上升，裝修一定好，如用這個思維，只對了一半！樓市升，另一方面代表買樓人仕的負擔更加重，錢去晒買樓，仲有幾多錢裝修？我以往測市是看交投，裝修旺市時，是樓市成交滯後２個月，是非常準確！
咁裝修旺淡是跟咩市呢？答案就是股市！而家股市２２０００點多點，早前曾見２００００點，好明顯一定影響到裝修行業的生意！人有冇錢同心情裝修，好睇有冇ＥＡＳＹ ＭＯＮＥＹ！一間裝修工程二三十萬，要靠慢慢儲的，啲人一定唔捨得洗。如果恆生指數上到２４０００點，裝修生意一定唔錯，如果升到２６０００點樓上，你間屋有排等了。
對上一次裝修行業大淡市正是０８年的雷曼事件，那些年，筆者仍然在ＹＡＨＯＯ和網友交流股票投資心得。雷曼事件發生後，筆者已醒水，點解醒水，因為我老早就研究緊股市，樓市，裝修生意的關係，所以神經是處於ALERT 狀態。點解最近幾個月前的大冧市我可以咁果斷離場？原因我早有去意，神經也是處於ALERT 狀態。
那段時期，筆者瘋狂接單，結果筆者的裝修工程，足足可以捱到明年的３月。如果當時唔醒水，裝修行業手停口停，咪話唔難捱。雷曼事件，對近年裝修行業打擊非常大，情況有如一個水緊水的水龍頭，被關到冇水出為止，一滴水都冇。唔係生意少，而是直頭冇！
筆者當年瘋狂接單，其實是遠超筆者公司的承受能力，好像一條蛇吞了一隻牛一樣，好難消化，但明知食唔落，都要博命食，唔食就有排唔食啦，跟本是冇得揀！每個人都有多事是自己想做，但其實又有很多事是自己唔想做，而事實上，可能好多事都是自己唔想做的！人生的旅程中，只要的是窮人，就要做很多自己唔願意做的事。冇錢，何來仲講專嚴？所以冇錢的，不斷要出賣自己去換出金錢，跪地餵豬乸，窮人生活寫照。最痛苦的，是看不到將來，只可見步行步，好奇怪，船到橋頭自然直，很多危難關頭，總會到時會攪掂。人最難的是要去堅持，最後成功的，往往不是最順利的一個，而是最堅持的一個！
收左人錢，預左畀人追殺，日日十四五個鐘，為求趕貨，真是大淡市下的大忙人，仲邊有時間在ＹＡＨＯＯ應酬咁多人提問？但唔答佢，又好似講到我欠佢，我來分享，不是來還債啊！世界就是咁，一樣米養百樣人。。。
裝修行業要到了０９年差不多５，６月才開始好轉，但一好，就不得了，原因是停了近９個月的生意，突然間湧晒出來同時間做。所以在我心目中，裝修行業是有一條 Demand Curve，短時間下，Demand 是有起伏的，但如果用 Long Term 的角度，Demand 是持續上升的。而 Demand 都是有一個平均值，如果一段時間過於滯後，會在未來的一段日子追回！這個情況就可以用０８年雷曼事件，生意突然像點穴一樣，停了一來！但市況一復甦，好像將０８年停了９個月的生意一下子走了出來。所以０９年的裝修大旺市，正是因０８年雷曼事件種下的因。
世界很多事都是像鐘擺。。。
YOKI WONG
２０１５年１１月２０日@大方向
沒有留言:
張貼留言