很多人認為大戶無論在財力、人力、資源和消息面上都比散戶強，所以大戶在股市投資贏錢比老散容易，某程度上來講是對的！特別是消息面上，通常老散收到的消息都已經過了四五重，所以周公從來不會跟風炒股，因為未開跑已輸在起跑線上，認真搏唔過。
不過做老散有做老散的樂趣，老散的優勢是靈活轉身快，我的錢我話事，長揸短炒皆可！例如「渣打供股」，老散可即時決定供或不供，有閒錢的話揸幾耐都得；基金大戶就唔同，他們最怕的就係跑輸同行，所以要他們鎖死啲資金喺一啲前景不明、可能要守一年半載的投資上，通常他們都唔會咁做！
昨日周公終於如願分4次共買入2800股渣打(02888)，均價是$73.8；不是說好了等 0.5倍PB(即$73)先買嗎？差不多吧，周公不是神仙點知個底喺邊？咁就先買一注免錯失機會，一鳥在手總好過百鳥在林，對不對？反正會再買，上限7000股！
翻查一下呢幾年兩大發鈔行供股歷史：
■ 2008年11月渣打以$45.11 作91供30，股價在2009年底前已升穿190元；
■ 2009年3月滙控(00005)以$28 作12供5，股價最低跌至22元左右，但年底已升穿90元；
■ 2010年10月渣打再以$156.82 作8供1，之後股價在年底前創咗歷史新高。
今次渣打仲有冇咁好彩？會！歷史總是不停地重復！如果再用陰謀論去睇，3月新主席和行政總裁上任，呢次一次過撇嗮上手的蘇州屎，有咁衰講咁衰，反正是上手的錯！然後再來個裁員重組，照咁睇下年的業績則會相對靚仔得多！
所謂好嘢要講三次！講咁多無非想再講多次：以低於市帳率 0.5倍買入香港發鈔銀行股票，抵到爛，冇得輸！仲有幾日，要買趁手！
周公
２０１５年１１月１２日＠大方向
沒有留言:
張貼留言