分段買渣打！屙煙利物浦

《易經》有云 : 窮則變，變則通，通則久。當事物發展到極點、窮盡的時候，就必須尋求變化，變化之後，便能通達，適合新的需要。筆者買入渣打(02888)，除了覺得以低於市帳率0.5倍買入香港發鈔銀行股票抵到爛之外，另一重要原因是渣打高層大換血！

相信受兩大股東淡馬錫及安本資產一齊逼宮，今年3月渣打高層出現大地震，包括行政總裁冼博德(Peter Sands)及主席莊貝思(John Peace)在內三大高層「被清洗」，當中摩根大通投資銀行部前聯席行政總裁比爾.溫特斯(Bill Winters)接任新總裁，接替六月離職的冼博德。

無獨有偶，渣打有份贊助的英超球隊利物浦，10月9日決定壯士斷臂，斬咗舊領隊羅渣士，馬上找來多蒙特主帥高普(Jurgen Klopp)接任，你都咪話唔信邪，利物浦即刻好似超人咁大變身，最近八場波竟然贏足七場，當中包括作客勝車路士 3:1、作客勝榜首曼城 4:1，真係勁到冇朋友！你咁勁，筆者當然要搭下順風車啦，屙煙(All in)買咗利物浦贏今年英格蘭聯賽盃冠軍！點解買$460咁零丁？因為當時個戶口就係得咁多！

凡事都有風險，利物浦唔係贏硬，講真呢個世界又點會有贏硬？最緊要值唔值博！利物浦換完新領隊好似著咗火咁，仲有5.5倍就認真值博！道理就如低過PB 0.5倍買渣打一樣。

不過睇番2009年滙控(00005)4月初以每股供股價28.1元完成供股後，股價曾經調整到大約28.7元。今次渣打的供股價是55.6元，所以不排除渣打的股價可能會跌穿60蚊！每個人承受風險的能力都唔同，大家要留意！

筆者怕麻煩，所以前2日賣出供股權，轉為每日買幾百股，希望買夠5000股，2年為限，目標賺40%！

周公

２０１５年１２月４日＠大方向