昨日恆指高開低收，最多升過242點，但高位沽壓湧現，其後反覆回落，收市跌176點，報19,711點，再創兩年半新低，跌夠未？如果你話股票難玩，咁油價又如何？
國際原油在前一周暴跌10%之後，本週繼續開啓暴跌模式，2天再跌8%，直逼30美元/桶大關！執筆時WTI油價跌幅超過4.0%，曾刷新12年低點至30.11美元/桶；布油短線下跌至30.66美元/桶，跌幅超過3.8%。
對於油價，呢啲太複雜喇，筆者識條鐵咩！總之，有人話係政治陰謀，又有人話係要以成本競爭打低對手，仲有人話係人民幣貶值令中國買少咗油，個個講到頭頭是道，都好似好有道理咁，其實咪又係馬後炮！
去年在油價大跌到60美元/桶的時候，不少機構大行紛紛發表報告話已經到底，油價將會回到90美元；之後跌到40美元時，大行報告又話真係見底喇，絕對唔會穿30美元；好啦，依家就話好可能見20美元了。所以話，大行報告靠得住，豬乸都會上樹。靠人不如靠自己。
恆指嚴重超賣，14天RSI已經跌穿20，短線隨時會出現較大幅度的反彈，加上罪魁禍首的人民幣匯率已經回穩，如果手上現金比例高的話，是時候考慮開始入市執平貨了；不過如果已經重倉，就無謂加大自己的心理壓力了。
咁買乜好？就買燃氣股吧！
發改委公報，11月天然氣消費量181億立方米，同比增9.7%；10至11月則同比上升7.2%，可見減氣價發揮了積極的作用，銷氣量下跌的趨勢已經逆轉，似乎燃氣公司已經走出低谷，曙光再現。華潤燃氣(01193)過去6個交易日跌了超過22%，14天RSI曾跌穿30，現價買入真係冇得輸。
周公
２０１６年１月１３日＠大方向
沒有留言:
張貼留言