彩星（６３５）新高指日可待

在上年度９月，在此曾經介紹過一隻冷門股－彩星（６３５），翻查資料，當時買入的股價平均為＄４。１４！

今天，持有這隻股已差不多一年了，亦如前兩天再加注。

這隻股有什麼吸引人的地方，之前已經說過：

http://yokiokay.blogspot.hk/2012/09/blog-post_11.html

http://yokiokay.blogspot.hk/2012/11/blog-post_6370.html

當時指出的條件，都是指這隻股折讓得太離譜，而時至今日，仲多了一隻忍者龜！

當初買入此股的時候，並不是買忍者龜，而是看好其持有的物業！

忍者龜大賣，引致彩星玩具（８６９）盈利大增，股價自然大幅上升，現價年度化市盈率僅6倍，忍者龜這些玩具，傳統上年尾才是旺季，所以股價借業績再上一層樓，股價再創高位，一些也不出奇！

彩星集團（６３５）持有彩星玩具５８％，以彩星玩具（８６９）最新價＄２。１６計，市值已達１４億６，已等於彩星集團（６３５）市值近八成。

彩星（６３５）雖然至今已升了一倍，市值亦只是１９億幾！

而之前說過彩星（６３５）擁有多項工商及住宅項目，當中包括位於某知名手機品牌落疊，自由行必到的廣東道彩星集團大廈、已入則屋宇署或重建的中半山麥當勞道多個住宅單位，有重建發展概念，位於屯門Ｖ－ＣＩＴＹ則的屯門彩星工業大廈，每股資產值高達廿皮過外！

先幾年，彩星（６３５）盈利大躍進，都是來自非現金性的物業重估收益，所以派息好姑寒，單看派息比率，是很低的，這是其中一個令我持有這個股票唔係好滿意的地方。

在今期中期成績表所提供的理由是：本集團維持經常性業務及未來增長及發展所需之現金於充裕水平！

但你唔好以為佢冇水啊，其實佢好疊啊！跟據中期成績表佢自己督爆，佢個銀行同埋手頭上嘅現金有成６億零５百萬，即以發行左嘅大約２億３千萬股，平均每股都有＄２。６現金。唔好以為佢留住啲錢來還債啊，佢而家公司個負債比率都只係講緊８。７％！

唔知知後會唔會有開始有些轉變呢？

原因是而家開始支撐盈利大躍進的已不單是一些非現金性的收入，而是有實質現金流的收入，因為賣龜及租鋪畀人賣生果，已有不錯的現兜兜收入。

這間公司時常［回購］，但絕絕絕絕大多數都是回購彩星（６３５），形同為此股打莊或護航。所以彩星（６３５）有條大水喉射住，股價低少少，就回購你，形同落閘，唔駛同你搭棚，設定位置打［纖滅戰］。

公司疊水，回購越來越凶狠

這間公司折讓咁大，如果我係佢老細，我覺得最好都係［私有化］左佢，費事煩，又要應酬你地班小股東，又要分錢畀你地，又要畀你班友指三道四。所以［私有化］是一個潛在可能性！

０８年，曾經有一個訪問，問及這間公司會否被私有化啊，當時老總陳ＳＩＲ已否認左，佢話冇興報喎！

曹操問司馬懿，你想唔想做皇帝呀，你估司馬懿會點答呢？好難想像有人對錢係冇興趣播！

話雖如此，大股東都係揸住４９％股權啊，表面上做戲都要做全套啊。而家淨係用緊公司錢注銷緊啲股票，注銷得越多，將來就聽少左好多反對聲音，短線上又可以支持到股價，形同打莊，而註銷左的股票，又可以推高每股盈利，一石幾鳥，實屬高章！

就算唔老屈佢想私有化，如果有間公司在盈利方面，在資產值方面，在潛在前景方面，這隻彩星（６３５）都好難找到第二隻咁筍啊！

究竟彩星（６３５）持有幾多資產呢？唔好在網上抄來抄去啦，抄功課都要識抄先得架！跟據佢自己假設唔係假數嘅中期業績報告，固定資產炒埋一碟有４８億，當中投資物業值４６億，而佢有一項叫［一間聯營公司之權益］，就值９百９０萬，唔知這間聯營公司係咩呢？仲有一項就叫［遞延稅項資產］值３千幾萬！

數字係死，人係生嘅！ＡＰＰＬＥ　ＳＴＯＲＥ以１１００萬一個月租左彩星中心１至３樓，１年收租１億３千２百萬，當回報率係４％，即乘以２５，單是這個１至３樓，都已值３３億！樓上仲有好幾層，有ＡＰＰＬＥ　ＳＴＯＲＥ係樓下，肯定拉高埋上面幾層，而家當有４％回報已是好保守了，而家買間住宅，都係得３厘幾，買個鋪位收租，邊有４厘咁多？所以佢自爆佢啲物業值４８億，我肯定說是唔止！

彩星工業中心，分兩期，一期有９層，二期有１７層，每層樓面有１８７５０呎，最近有個著名投資者波叔係屯門買左個有成工業大廈全幢，當然冇彩星塊地咁靚，都要賣＄２１６５一平方呎。當彩星工業中心又係喱個價，２６層樓面乘以１８７５０呎＝４８７５００平方呎，每呎賣２１６５蚊，即值１０億５千５百萬啦！

仲有彩星中心樓上的樓面，半山樓啲豪宅，點止加埋４９億？未計及重建這個因素啊！

流動資產方面有９億幾，當中現金及銀行存款有６億幾，應收帳有近２億，其餘細數的是存貨之類的東西！

流動負債方面，有６億４千幾萬，當中有３億６千萬是銀行貸款，另外有億幾係撥備，有億幾係預留交稅的，其他燈油火臘未畀錢人的日常支出及收左人啲按金等有２億！

長期負債方面，有億幾銀行貸款。

所以計計埋埋有４９億淨資產值，按而家發行左大約２億３千６百萬股，即每股大約淨資產值有＄２０。７６！所以現價折讓幅度高達60%，變相四折大平賣。

股價方面，現價８。３４，往績ＰＥ計１。７２倍，ＰＢ約０。４倍，收住先息率１厘多啲，條數冇水份。

股價走勢方面，ＭＡＣＤ有升穿訊號線之趨勢：

而１４天ＲＳＩ亦有突破阻力之趨勢！

最近彩星（６３５）整靚左佢公司個網頁，http://www.playmates.net/big5/businesses/otherBusinesses.htm

有興趣可以望下，佢係網站自己講，屯門彩星工業中心現時租戶組合包括從事倉儲業及輕工業租戶。同隔離Ｖ－ＣＩＴＹ隔籬街，攞來做倉，大唔大嘥呀，快快申請改變工地用途啦！


YOKI WONG

參考資料：

http://www.irasia.com/listco/hk/playmates/announcement/a112661-cphl2013interimannouncement.pdf