本文已於１月１３日在大方向發表
恆指昨日穿頭破腳下，幸得外圍做好加上連插多天下超賣嚴重，大市終於反彈了！
今早恆生指數高開３１７點，一開市已在兩萬點樓上，係威係勢！大陸公佈國內１２份出口數字，市場喜出望外，若以貶值中的人民幣計算，增幅為２.３%，好友乘機夾高指數，帶領恆指報復式上升超過５００點，高見２０２３４全日高位。昨天本欄指出要升穿２０３００點才有轉勢的可能，今天勢頭不錯，都衝不破，指數隨即回頭，好友暫時技窮於此，所以２０３００點是一個值得存記的指標位，升穿才可以看高啲，升唔穿就打番轉頭！筆者又講過，升幅最多６００點，今次５００點已行人止步，因為買的人只是博反彈，有位就食，所以咁既市，有反彈，冇轉勢，除非出現一件事，暫時筆者仲未唸過是咩事，才會令投資者的行為大幅改變，否則，劇本將繼續係咁發展落去。
說回個市，未到中午食飯，國內股市已率先向下，恆指已衰衰地叫做應左非常超賣下只終都會反彈的市場期望，拖到下午１：３５分左右，大市已受不起國內股市的引力，恆指升幅越升越少，下午３：００時已再次失守２００００大關，炒友見大勢已去，怕自己企錯邊，紛紛轉軚，恆指要跌到１９８５０點才開始喘定再次反彈，唯２００００點大關阻力很大，臨尾５分鐘，好淡相方較勁大打真章，淡友明顯勢優，最終恆指全日上升２２３點，收報１９９３４。１４天ＲＳＩ為２７.３，超賣略為改善，ＭＡＣＤ仍未出現拗腰轉向的趨勢。國指則升５５點。大市成交與昨日相若，達７７３億元。
上文所說的什麼國內１２份出口數字，令市場喜出望外，講到好似好好咁，其實國家全年外貿的設定的目標是６％，今年這個數字已是連續４年未達標！
所謂好過市場預期，最大可能是因為已連續４年交出來的數字都是太差，市場早已習慣失望，所以已開始唔敢咁大想頭開個好好預期出來。所以，條數冇咁差，就變左優於市場預期，壞消息突然變左好消息。
今次條數由玩下匯率，若以美元計價，１２月出口實際是按年下跌１.４％，進口則是下跌７.６％。不要以為人仔貶值會對出口好有幫助，因為亞洲區其他貨幣早已是跌幅大過人民幣，人民幣最近的下跌，只是追貼番少少其他亞洲國家的匯價跌幅。而人民幣亦不可能無止境的下跌。
再者，出口都要看很多問題，中國經濟已在結構性轉營中，因勞工成本，土地成本等已相對亞洲其他二三線國家為高，中國早已在低端產品失去價格競爭力。看完對手，就看對象，環球經濟，最近除美國好啲之外，其他國家都好一般般，環球經濟面對緊通縮風險，對商品需求不是咁易復甦，所以筆者對中國未來的出口，不予厚望，最多只是玩下數字遊戲，用匯價下跌來掩飾下！
因此，如果估到中國靠出口呢條橋行唔通，就可以估呀爺唸緊乜橋救經濟？
基本上，放水已是指定動作吧，對股市影響，未必一定正面，因市場又可將這個消息演譯為經濟又差左，所以每次降息降準之類的放水行動，好多時都見光死。暫時看，磚頭最穩陣，一放水降息降準樓又升，人仔貶值，迫人民唸方法將啲銀紙去保值，大陸又當然知道班友想將啲錢搬走啦，其實係人都知，國人心講愛國，實想出國，所以大陸早就唸左好多方法，設定關卡去阻止資金流出。
所以講來講去，暫時都是買樓最實際。
YOKI WONG
沒有留言:
張貼留言