此文章已於１月２５日在大方向發表
在港元匯價回穩，國際油價顯著回升，外圍股市做好下多重利好消息帶動下，非常超賣的港股今天作出第二日反彈，恆生指數以１９３４１開市，高開２６０點稍作回調至１９２９１全日低位即開始再度衝高，捱打多時的好友，霎時間氣勢變得一時無量，一鼓作氣將大市推到１９４９０全日高位，並升穿１０天線，自為１２月初跌穿此線後，首次升穿，唯大市在１９５００點有明顯阻力，好友破關，功虧一簣。
今年１月１９日，中國公佈第四季ＧＤＰ不能保７外，也低於市場預期，大市反借央媽將會救市來一個炒作，當天恆生指數大升３９８點，當日最高曾見１９６４７，今天在多重利好消息下，指數最高也只是１９４９０，即仍未上破上次壞消息當好消息炒的高位，所以連續兩日升市，暫時仍未可當轉勢而論之，投資者宜要記得之前經過的一些指標性位置，才可作出準確轉勢判斷。
最終恆生指數全日升２５９點，收報１９３４０點，十天線得而復失，１４天ＲＳＩ回升至３６，兩日反彈下，技術性超賣已明顯改善，樂觀者可說成大市已初步回穩，走勢明顯轉強；悲觀者，自可說成技術超賣已改善，再無超賣下作反彈借口。雙方各自表述，大可自圓其說。ＭＡＣＤ在連續兩日回升下，初見拗腰轉勢意圖，仍未升穿ＥＭＡ（９）。國指則升６８點，收報８１７３，今日大市總成交７４４億，與近日差不多。
今日教授在生果報講到報章的點擊率也清楚反映了股市的盛衰。。。從點擊率看股市蝕錢人數
教授為知名財星，當然可以根據其半消閒式的搵食格仔，在生果報這個大圈子作抽 SAMPLE 去［估］市場羸輸人數！而筆者當然可以從［八路富豪聊天室］這個中圈子抽SAMPLE 去［估］番市場羸輸人數！
教授估在咁既市下，有９９％人在輸錢，我相信大圍條數都是，因而家個大市是在幾年前的低位，而所謂大市，即是說是買緊藍籌股，而很多二三線股，早比藍籌股跌得多好多。而一般散戶，又有幾多人會買藍籌股？以筆者眼見，大部份散戶，都是沉醉於細價股中，自以為可以鱷口偷金，同庄家對賭緊。在庄家角度，間中畀你贏下，有乜所謂？成本一部份也，成日輸搵鬼來咩？庄家不怕你贏，只怕你唔來！
他們以為搵錢好容易，襟一粒制就賺一萬幾千，世界上邊有啲咁著數既事，咁個個唔駛番工啦！通常當你覺得襟一粒制就賺一萬幾千，快如閃電，咁著數既事，經驗所得，都是尾升了！
散戶的致命傷是什麼？
就是贏少少就歡喜若狂，賺少少就雞咁腳走，可能佢地都知自己在鱷口啦！蝕又點？駝鳥政策！敢贏唔敢輸！
即是說，贏就永遠是粒糖；輸親都是間大廠！
平均長線計，當然是輸啦！
［八路］當中，究竟又有幾多人要輸錢？我相信是９成，因有１０％［八路］早就在高位跟了筆者離開了股市。
YOKI WONG
沒有留言:
張貼留言