超賣下絕地反擊 美股獨善其身？

恆指由２０１６年第一個交易日由２１８８２，短短經過４個交易日，指數曾最低跌到２０３２３點，跌幅高達１５５９點，超過７％，１４天ＲＳＩ跌到得２０邊緣。由於大市短線跌幅過大，超賣嚴重，加上內地宣布暫停實施跳ＦＵＳＥ制度（指數熔斷機制），而人民幣中間價又輕微回升，幾大因素配合下，恆指終於在上周５來個反彈！

恆生指數（周５）高開１５８點，經過一段急隊至２０３２４點後（即對上一個交易日最低位２０３２３點多一點）的位置開始反彈，至臨食飯前升至全日最高位２０５９６，上升２６３點就無已為繼，其後指數回順至２０４５０左右位置，好友再度組織攻勢，惜未到當日高位２０５９６已遇到強大阻力，可見２０６００點阻力甚大！２０３２３及２０６００可視作短期指標性指導性作用位置，升穿２０６００是首要轉向機會的指標，而跌穿２０３２３，指數再向下大插機會甚大，相信會引到很多人止蝕！

最終恆生指數升１２０點，收報２０４５３點，結束４連跌，１４天ＲＳＩ見２７.９，超賣略為改善，ＭＡＣＤ仍然是向下勢頭，未見拗腰回升之勢。國指則升９１點，收報８８４５。升市成交減少，全日成交為８５５億元。

筆者執筆時，美股周五仍未止跌，下跌１６８點收市，恆生指數１月夜期則跌２２９點，報２０１７０。即是說，期指已率先跌低過剛才所說的２０３２３的５２周低位，所以周一開市，恆生指數非常高機會會再創新低，好友將會在２００００點大關死守，築起人肉長城，就看看這個長城頂唔頂得住！萬一失守，指數很快就會到１９３６０的位置。

前一篇［大趨勢］，筆者指出港股將會反彈，周５已兌現，而指數最多亦只升２６３點，連３００點都不夠，筆者說６００點以內是由於相信大市超賣下會引到一批跌市博反彈的賭友入市，而這班人相信有３％水位就會食糊，所以若彈到６００點，這批友仔將會走出來沽貨。而今劑反彈最高只有２６３，也說出一個事實，即使想再絕地博反彈，風險也非常之高，假設你最具膽識加上幸運在最低位入市去博，又在反彈最高位走，也不足２％畀你食！走唔切，大閘蟹又再綁多一圈了。入市博反彈者，絕大多數將會成為大戶沽貨走佬的對手，在這個反彈之中，能鱷口偷金者，只為極少數！

美股早前相對環球股市是屬於強勢，是否美股可以在美元轉強下，環球股市大瀉下可以獨善其身？

１９９７年的金融風暴前，筆者剛時畢業不久，在ＹＲ１已借　GRANT LOAN　踏足股市。那些年，當時筆者身邊不少朋友都知道我贏了不少錢，所以很多同學，朋友，同事，上司見筆者搵到，都很自然問下我攞貼士，這就是人性！最後經過多次反覆論證，當這批人原本唔投資股市的人都走去想學炒股，想撈番啲油水時，而你又當時覺得搵錢很容易，好想炒老細魷魚的時候，通常股災都將會發生。

當然，筆者那些年都是經驗唔夠，最終未能幸免於難，但當年其實也是分析得頭頭是道。

有一次，放學後，其實即是放工，因筆者當時晚上是做緊兼職教下夜校！原本當年唔炒股的學校揸ＦＩＴ人，都捉左我入去佢間房，原來是問股票！

當時情況是咁的，恆生指數開始向下，當年有一類股票是異常硬淨，這就是紅籌股。

由於那些年，筆者由學校走出來不久，當時樓價也是天價，當年綠揚新邨已要成３球幾，海怡半島要成７５００蚊一呎，現時看好似唔貴，但那些年，跟本是對於一個剛從大學走出來的年青人來說，是遠不可及。

當年筆者都叫擊敗９９％群眾才可入到大學，呃左張原來冇用的沙紙，或可以叫做搵工的基本入場卷，原來出到社會，個結局好大機會是連買一層樓都買唔到，簡直是諷刺。其實筆者那些年份工人工都唔差，計埋 Commission 每個月都閒閒地萬六七，但又有何用？啲樓一個月又升幾％，個個月貴十幾萬咁升法，靠打工儲錢上車，簡直是 Impossible。

由於筆者要將 Impossible 變成 Possible，所以筆者那些年放工就要去教夜校，星期六，日就殺補習，基本上我是爆晒鐘的，夜晚補到９點１０點都有客，由於時間緊迫，成日要食麥記，所以麥記已變成我而家最唔鍾意食的地方。此外，當年仲有兩樣靠個電話就做得生意既上門補習介紹同埋當年剛剛興起的傳銷，一個人有兩部 Call 機，因為一部 Call 機會被 Call 爆，幫人補緊習，教緊書當然唔得閒覆 。其實，咁多秘撈個老細都知知地，但老細都冇我符，因為公司有３份１的生意是我搵番來，加上又唔關佢事，所以佢都冇乜理由要干涉，最緊要我有生意番。夜校揸 FIT 人當然知道其事，最後我教左５年離開了去全心全意攪自己的裝修工程公司，夜校揸 FIT 人臨別秋波，最後的評語是耐力驚人，冇想像過一個人可以咁樣堅持到咁耐！

其實，算是什麼？中國被日本仔打，８年抗戰，最後勝利，都是一份堅持！

當年，筆者大概每月搵到４萬幾，相對同窗當時很多自我感覺良好，屋企有啲錢的就學人睇唔起人的富家子弟相比，其實我都已經唔可以同佢地係同一班次作賽了。通常筆者每個月都會花３，４千蚊左右，所以每個月都剩了幾皮野，全部 ALL IN 去投資股票，仲要做埋孖展，經過３年的奮鬥，股票戶口終於都過百粒，扣埋借證券行的，都有６０皮左右。當時，筆者仲唸緊，唔知幾時實數有一球？

由於樓價升得太快，借衡孖展都是同啲樓的升幅同步，因啲樓條數大，於是筆者已覺得，這個方法都是行唔通，橫又是死，掂又是死，總之計來去行唔通的路，一律唔行，於是就開始用窩輪加多啲槓桿。

當年紅籌熱，筆者個倉粒粒皆星，可以媲美大摩馬房，基本上邊隻當炒的紅籌，我都有，仲要係輪，所以當年臨爆煲的日子，個倉的剩資產值都是每天兩萬兩萬咁上，以咁既速度，是才有機會追到樓價，如果慢過咁既速度，買樓跟本是冇可能！

當時藍籌已開始向下，但紅籌依然堅挺，筆者當時押重注落紅籌，也自我感覺良好，因人地跌，我的冇跌，仲要升！因我當時覺得，藍籌同紅籌是兩個完全唔同的市場，藍籌是代表香港的傳統經濟，紅籌則是縯譯中國大陸經濟開放，經濟起飛的故事，兩者跟本是唔同！

最後賽果是什麼。。。。？

不用說吧！

筆者６０萬倉，最後止蝕，計埋都只得番１０萬。。。想砌到上１００萬的夢想成空，３年的奮鬥，被金融風暴一鋪吹冧，一切又要從頭來過！

這個故事，就是一個教訓！

就是千祈唔好以為唔同市場，自圓其說做大好友，以為自己買的未跌就唔會出事！最後經驗證明，當藍籌跌到咁上下，紅籌就相對偏貴了，最後相對貴的，都是難逃被洗的命運！

筆者愛看歷史，常以歷史去分析問題，所以我寫的［劇本］，很多都是源於歷史因素去猜度。而事實上，故事是一個又一個的重複發生，舊酒新瓶！

今天的美股，尤如惜日的紅籌，最後賽果會點？

歷史將會告訴你！




YOKI WONG


以上文章已於１月１０日在大方向發表