今日為２０１６年首個交易日，筆者在此先祝各位看官在新的一年都能早着先鞭，快人一步！
新年雖至，但氣氛不能為疲弱的股市充喜。由於上個交易日歐美股市尾市已倒水，加上內地公佈上年１２月份財新製造業ＰＭＩ降至４８.２（見附圖），已連續十個月低於５０的臨界值，且差過市場預期的４８.９，跟據財新智庫首席經濟學家何帆表示，１５年１２月財新中國制造業ＰＭＩ反彈趨勢受阻，預示出經濟繼續面臨較大下行壓力！
由於經濟復甦憧憬幻滅，引致Ａ股暴跌，午後滬深３００指數挫７%，觸發全日熔斷。本港股市在這個宏觀大環境下，恆指一開市已低開１３１點，隨即越跌越有，到下午２點２５分跌至全日最低位２１２２７，才開始有技術性反彈，但升至２１４００已無力為繼，並於２１３００點左右拉鋸至收市。最終恆生指數全日收報２１３２７點，大跌５８７點。常用的平均線全線失守，１４天ＲＳＩ跌至３６.６，自上年度１２月初跌穿５０開始，只有兩個交易日１４天ＲＳＩ企於５０樓上，整體大市弱勢明顯，ＭＡＣＤ早前升穿ＥＭＡ（９）後，再次轉向，有趨勢再次跌穿ＥＭＡ（９）。國指更大插３４９點，收報９３１１。升市少成交，跌市大成交，今天埋單成交金額７３８億元。
從圖表觀之，整體走勢未擺脫下降通道，早前技術性反彈，可能又是一個製造出來的技術性反彈請君入甕。筆者至今仍堅持自己想法，由於未來日子沒有一個很大的利好消息配合炒上，企業業績成績表很大機會都會令投資者失望，３，４月為成績表派發期，醜婦終需見家翁，業績冇野好炒，唔通又講深港通？人仔匯價下跌，國家已怕資金會外流，而家攪深港通，究竟是幫助資金流入定流出？５窮６絕７翻身，看似仲有半年捱，捱過也未必代表會Ｖ形上番，大戶在跌定後，會在大市未明朗時慢慢收貨，市況應會出現一段橫行整固收貨期，大戶殺了個市落來，成個魚缸都是大閘蟹，大戶唔似咁蠢推番個價上去畀你走，因此筆者唔相信係短時間會再次做上。大戶都是取易不取難，任何好消息，一定要看其利好的持續性才是真火，尤其是很牽強的所謂好消息，很多都是大戶炮掣出來的假像！看劇情發展，市況暫時仍是有反彈冇轉勢格局，指數將近２１０００點或會再有一個技術性反彈。
股市雖未至人間煉獄，但隨時好戲盡在後頭。筆者在２６０００點走人，２００００點再全力入市，趁雙降好消息，這個浪殺番佢６０，由於想搵多些快錢買樓，所以甘願做個渡火海的人，逃出火海又衝番入去，點知畀佢殺番成２０，筆者最終借人民幣入ＳＤＲ的好消息教腳走人，退出股市，並全身投入中山的樓市。
中山樓市由之前：
～乜你地咁睇好中山嗎？這處唔會升架！
～中山的庫存，真要多謝你們香港同胞了。。。
～中山大把樓啦，中山是個死城。。。
發展到今天：
～火炬區庫存被深圳人掃至０！
～海茵新城出現排隊搶購人龍，一日唔夠打光！
～以前冇人要的西區，由４，５０００一方，夠薑而家開６５００！
～金域藍灣低層垃圾池附近都有人要，新一期單位已叫９５００至１００００一方，相比６月時只是唔夠７０００一方！
～港口保利國際廣場，幾個月前都要３日賣光一棟，發展到最近１小時就打光！
～遠洋新悅樓下的大信新都會快開張，最後一個單位３個人爭，最終大打出手爭樓收場！
～遠洋系所有樓盤即時封盤，再提價重新發售！
投資能否獲厚利，首要條件當然好在乎你能否預知未來，在眾人看不到時，你看到。其次是你能否知行合一，唔係得個睇字，得個講字！看準後，是否能兵貴神速，快人一步，出手夠唔夠凶狠的問題！
YOKI WONG
更多精彩文章盡在大方向
2 則留言:
謝分享!
好文 !
張貼留言