打造大飛機（轉載）

打造大飛機

（轉載自ＡＭ７３０　順叔）

大國崛起，其實好唔得閒，要射人上月球，又要國產大型客機衝上雲霄。打造大飛機，可以話係幾代中國航天人夢想，決心氣魄，同當年冇褲著都要原子彈差無幾，傾全國之力要做到也，07年立項，由中國商用飛機負責研製開發，料2014年首飛，兩年後投入市場。

兩年一度嘅珠海國際航天展啱啱閉幕，國產大飛機C919首次亮相，雖然得半隻機殼，冇翼冇引擎，已經成為全球航空業焦點，仲聲稱接獲100架訂單，買家幾乎清一色係國企航空公司，暫時唔知係咪落訂冇退款嘅霸王死約，但如果C919可以安全起飛穩陣著陸，就算淨係賣中國市場，Airbus(空中巴士)及 Boeing(波音)兩大歐美巨頭，已經唔可以獨霸藍天，A、B之後，要加個C。

中國商用飛機公司料未來廿年，中國需補充4,439架民用飛機，總值超過4,500億美元(約3.5萬億港元)，超大部分係C919類型幹線機，一隻大飛機，零部件超過400萬件，邊間公司做乜嘢特別叻，有冇國企做到勞斯萊斯級起動引擎，要專到無倫嘅專業人士先識講，財經茄哩啡只可以計條師奶數，一個幾千億美元大餅，就算放十分一落中國民用航天工業，拉動增值作用亦相當可觀。

呢個大餅，國企以前餅碎都食唔到粒，龍頭中航工業，08年重組後營業額過千億元，但相信絕大部分來自非上市軍工生意，旗下逾廿間中港上市企業，09年前幾乎冇一間營業額過百億元。

今日歐美巨頭要飛入中國，侷住分餅仔，空中巴士在天津總裝線，舊年6月交付咗第一架A320，又同幾間上市國企在哈爾濱搞咗個飛機複合材料製造中心，多咗 外國生意，加埋C919開始砌機，生產飛機零部件國企，應開始步入增長期，如果打造大飛機順風順水，出現類似早幾年車企爆炸性增長，未必冇可能。

可能早年冇啖好食，好多掛名「航空」上市公司，業務雜碎到你估唔到。深圳中航(161)，表面上做液晶體顯示器，其實做手錶；中航工業國際(232)，表面上做直升機，其實做蒸汽機。
仲有航天控股(031)，表面上做火箭，其實做地產，08年底同母公司成立合營企業，發展海南島航天發射場配套區，總投資約12億元(人民幣，下同)，今年8月，逾4,000萬元買斷母公司35%項目持股，叫做筍，一個400萬方米加4公里海岸線地產項目，有錢發展都冇技術經驗營運，應該會學雅居樂 (3383)發展海南項目，轉手引入策略投資。母公司於周二在網頁偷偷哋公布，項目發展大綱，已獲市政府批核，一個住宅酒店項目，隔籬同時有火箭升空，點 搓得埋，要等公司交代詳情，但若當呢隻係海南特產，旅遊炒磚頭，現價平過雅居樂好多咁囉。

上回講到，以前生產飛機及零部件國企，無啖好食，侷住不務正業，今日內地決心打造大飛機，殺入民航工業市場，歐美巨頭又要生意換生意，令呢個幾年前廢墟一片嘅板塊，有望苦盡甘來。

民航產業起步慢，亦反映在相關國企布局，龍頭中航工業，在08年底，由一航二航合併而成立，旗下中港上市公司，多達21間，東一忽西一忽，有急切需要進行架構大手術。

一間架構亂七八糟巨型國企，睇重邊個上市平台，其實好簡單，留意吓黨企大佬，同時坐喺邊間上公司董事局就知道，中航工業集團最高層，包括大哥大林左鳴，只擔任其中一間公司董事，就係香港上市嘅中航科工(2357)。

中航科工今年8月，將原本好似飛行棋嘅公司標誌，換上跟母公司相同嘅噴射機招牌，策略定位，變成集團「民用航空產品製造業的旗艦公司和國際化融資併購平 台」。中航科工目前總市值大約190億元，據傳媒報道，集團副董事長譚瑞松，於8月講過，目標在3年內，透過注入資產，將公司市值谷到過千億元。

相關注資概念，條街其實大把人唱緊，近年國企賣嘢俾香港上市公司，亦唔見得有乜親情價筍貨，變數太多，聽吓就算，最緊要係公司盤生意，本身有冇增長潛力。

中航科工今年已經賣咗汽車業務，變成一間純正民航產業公司，基本上有兩大瓣生意。第一項，本業，製造通用航空飛機及零部件，即係直升機或小型飛機，第二 項，係透過旗下附屬公司，以及同姊妹公司合資企業，製造民航飛機零部件及材料，空中巴士在天津組裝線，以及在哈爾濱複合材料製造中心，中航科工都持有兩成股權。

國務院及軍委會，上星期已出咗通知，未來十年逐步開放4,000米以下低空領域，即係話，由通用航空到私人飛機，以後唔使用幾個月時間向解放軍申請，會唔會多咗內地富豪買私人飛機直升機，又會唔會買國產貨，唔知，係都冇咁快，但來自旅遊或農業等通航需求，肯定會增加。

民航產業，個餅更大，中航科工旗下兩間A股公司，包括洪都航空及哈飛股份，過去一年股價炒到雞飛狗走，中航科工持股近五成，現市價計，幾乎已等如本身市值。

中航工業擁有近壟斷地位，但做飛機太複雜，業務分散在系內上市公司，唔似能源或電訊巨企咁簡單，聽講林左鳴熟讀通用電氣(GE)發展史，目標將中航集團變成好似GE咁，軍工轉化民用嘅綜合巨企，GE有個Jack Welch(GE前行政總裁)，中航工業以至中航科工最大問題，係集團企管能力，可唔可以應付到迅速膨脹，但又極度複雜嘅業務。

汽車產業過去數年，出現爆炸性增長，原因得一個，就係內地需求。民航產業，要同歐美巨企與虎謀皮，唔會咁簡單，決定因素在於內地打造大飛機，係咪順風順水，如果相信只要有夢想，可以登空探月，國產大型民航機翱翔藍天，未必係非分之想。