環球股災停不了 恆指再失萬九點

此文章已於２０１６年２月３日於大方向發表

石油價格大跌，３０美元大開再被隊穿，美股隔晚大插近３００點，恐慌指數ＶＩＸ，頓成恐怖指數，大升１０％。港股今早開市，大插插已是市場預期之內，大陸佬早已有人借買保險匯走人仔，呀爺以前都是隻眼開隻眼閉，最近國內資金流走驚動到呀爺神經，呀爺自然要堵塞下資金流出渠道，銀聯第一個發炮，指出境外買保險單筆５０００美元限額一直存在，市場於是更加擔心內地限制資金外流！所以本港上市而非中資保險股最近重挫！

在這個宏觀環境下，恆指今早先裂口低開５３５點為敬，１０天線如同不設防！一輪恐慌式拋售下，恆指最多急挫６８２點，低見１８７６４點。午後，思想正面點有點資金趁低吸納，思想邪惡點可說成大戶炒番高些再引對手入局，恆指跌幅因而收窄，曾重上萬九水平，最高曾見１９０３２全日高位，１９０００點樓上沽壓沉重，阻力很大，好友也銀彈及信心都力有不繼，１９０００點最終未能捱到收市，恆生指數最終全日跌４５５點，收報１８９９１點，指數再次低於所有常用平均線，全日沽空金額高達１０８億５，佔總可沽空彩池２１.３％。１４天ＲＳＩ報３７. 7，ＭＡＣＤ開始有趨勢再向下，恆指距離５２周新低尚有３００點左右。國指則跌２００點，８０００點大關失守，收報７８５８點。恐怖跌市下，大市成交額增至７８６億元。

筆者最近同大少看了一齣講股票的神劇，有啲時代觸覺都知是講緊邊套。該片的時代背景是０７年美國房地產未爆煲之時，當時只有一位高人，當然是片中的男神，佢信心十足，一鋪同佢ＡＬＬ　ＩＮ外，仲要在車房仔攪左個基金，以期權形式再找投行做對手，買美國房地產將會爆煲，美國房地產將會出現信貸違約。以當時時代環境，美國樓市仍是表面歌舞昇平，否則投行都不會冒險做蝕本生意，美國樓市會冧？在當時來說，簡直天方夜譚！因從未試過！片中投行狂言道：這是華爾街，有人擰錢上來，唔通唔要咩！收左錢後，仲要大笑一場，心唸，邊有咁大條傻仔水魚送上門？今鋪食硬你！可見當時，邊個會唸到美國樓市會冧檔？

最近我啲思維也有性轉變，就是除了捉交易對手錯處外，就是調轉來唸。好似最近董事杯，詠彩繽紛好正路都是公眾熱門，那場馬，看牌面，基本上主角馬有３匹：詠彩繽紛，美麗大師，大印銀紙。我的思維已不是考慮這３匹馬的機會率，而是考慮這三匹馬入唔到圍的機會率，詠彩繽紛，美麗大師，大印銀紙三匹都是公眾熱門，飛一定聚晒這３匹馬身上，只要開乜左，自然有得分，所以思考上，就是要唸這三匹馬輸的理由，詠彩繽紛２.６倍，是否贏晒？買馬，同投資一樣，要看值博率，當太多公眾聚焦某隻馬（或投資產品）上，這匹馬機本上的值博率好低，所以就以這場馬的情況，不應是博詠彩繽紛會贏，而是博詠彩繽紛會輸，因為詠彩繽紛低值博率，意味著其他機會馬就是超左賠率。當日筆者就買了大印銀紙，戰利品，詠彩繽紛，美麗大師，美麗之星，複式三重彩，目的就是博詠彩繽紛，大印銀紙等熱門唔會順住番來。此場賽果是：大印銀紙，戰利品，詠彩繽紛，美麗大師！真是開乜左，哈哈！

睇完美國樓市大冧檔嗰出戲，咁啱得咁橋，最近《彭博》報道，內地投資企業債的金融機構，所面臨的違約風險上升！其實，國內很多企業跟本上是借唔到錢的，如果借到，邊有人咁蠢畀成十厘息，發行什麼債券籌錢？唔通貪息平嗎？就是國內錢莊，跟本唔係好借錢畀企業，多數借晒畀國企，或有物業擔保嗰啲。

國內銀行，好多都有什麼理財產品，筆者都時常懷疑，點解咁好ＰＡＹ？有些仲實牙實齒，言之鑿鑿講明保本喎，啲錢又經銀行過橋濕下腳之後仲有咁多ＰＡＹ畀你，究竟買左乜？筆者成日是覺得買左企業債，而當然，銀行同時間可能對沖左違約風險，找了另一個對手 TAKE RISK, 銀行從中抽水。咁既市況，筆者相信取得一定投資收益，這些金融機構，包括銀行或有投資企業債。

自去年開始，內地已總共有７宗公開發行的信用債爆發違約的事件。由於投資企業債的金融機構為免中伏，報導指出這些金融機構已採用不同手段，包括避開產能過剩的行業與高危企業、成立評級團隊等，減低投資風險。不過由於不少產能過剩的企業，都是依靠產能規模取得銀行貸款，倘若這些企業因供給側改革而被迫減少產能，可能會妨礙他們取得貸款，繼而導致違約風險增加。

企業債違約風險增加，會否是國內股市其中一隻黑天鵝？




YOKI WONG