仲有幾日，令人難忘的2015年即將過去，今年股市可說是驚心動魄的1年，短短100日就經歷了從「天堂」到「地獄」，大家還好嗎？
美國經濟正漸入佳境，剛剛更迎來近10年來首次加息，正式步入加息周期，相對其他貨幣而言，美元表現可以話係一支獨秀，美匯指數全年上升超過8%。市場預期美國經濟將維持增長，聯儲局明年會加息4次，咁明年美股走勢會點？
老實講：唔知！因為連耶媽自己都唔知明年佢會加幾多次息，所以一切的推測都係靠估。不過明年是美國的大選年，翻查歷史數據，從中或者可以得到一些啟示。
由1940年開始，美國共經歷了19次總統大選，在這19個大選年當中，美國經濟只有兩年錄得負增長，而且負增長均十分輕微；即係話有近九成的機會GDP錄得增長，平均增幅是4.13%。看來一如坊間預期，美國明年經濟增長之可能性相當大。
股市又點？在過去19個總統大選年當中，其中有14次美股(以標普500指數計)錄得升幅，機會率高達七成，平均升幅有5.7%。咁都好正常，臨走前最後一年點都要做得好好睇睇，即使不能流芳百世，亦不想遺臭萬年，另外也可以為自己所屬的政黨做勢，爭取選票。
2009年以來不斷唱好美股的大好友、沃頓商學院金融學教授西格爾(Jeremy Siegel)亦發表樂觀預測指出，2016年美股仍會向好，全因聯儲局極其量只會加息2至3次，低企的利率會令企業盈利繼續錄得增長咁話。
筆者的話可以唔聽，不過呢個大好友的話都係聽聽好。事關佢自2009年以來不斷唱好，美股就從八千點一直升到依家。在今年8月大冧市時期間又明言美股已見底，結果又俾佢估中咗！
咁短期策略點？梗係放假等收工啦！等埋明年1月中A股解禁、美股開始派業績，形勢將會相對明朗，到時再好好部署吧！
周公
２０１５年１２月２９日
沒有留言:
張貼留言